संगमनेर, ०९ जुलै २०२५- प्रतिनिधी:
संगमनेर शहरात पहाटेच्या सुमारास पोलिसांनी केलेल्या धडक कारवाईत गोवंश हत्याकांडाचा पर्दाफाश झाला आहे. या कारवाईत लाखो रुपयांचे गोमांस आणि हत्यारं जप्त करण्यात आली असून, तिघे आरोपी पोलिसांना गुंगारा देऊन पसार झाले आहेत. संगमनेरचे आमदार अमोल खताळ यांनी सध्या सुरू असलेल्या अधिवेशनात यासंदर्भात प्रश्न उपस्थित केल्याने, या कारवाईला विशेष महत्त्व प्राप्त झाले आहे.
मिळालेल्या माहितीनुसार, आज पहाटे १.३० वाजण्याच्या सुमारास तीनबत्ती चौकात थांबलेल्या पोलीस उपअधीक्षक डॉ. कुणाल सोनवणे यांना या अनुषंगाने माहिती मिळाली होती. संगमनेर शहरातील मदिनानगर परिसरातील गल्ली नंबर ५ येथील फैजु फारुक कुरेशी यांच्या पत्र्याच्या वाड्यात कमरअली गुलाम जिलानी सौदागर आणि शहबाज बुटन कुरेशी हे गोवंश जनावरांची कत्तल करत आहेत. ही माहिती मिळताच, सोनवणे यांनी तात्काळ याची माहिती आपल्या पथकाला देत कारवाईसाठी बोलावून घेतले. पोलीस नाईक राहुल कचरु डोके, पोलीस हेड कॉन्स्टेबल अनिल कडलग, आणि पोलीस कॉन्स्टेबल राहुल सारबंदे त्यांचे पथक तात्काळ तीनबत्ती चौकात आले.
पथकाने मिळालेल्या माहितीनुसार, फैजु फारुक कुरेशी यांच्या वाड्यावर छापा टाकला असता, तिथे एक व्यक्ती गोवंश कत्तल करताना, तर दुसरा कत्तल केलेले गोमांस चारचाकी वाहनात भरताना आढळून आला. पथकाने तात्काळ संगमनेर शहर पोलीस स्टेशनचे रात्रगस्त अधिकारी पोलीस उपनिरीक्षक समीर अभंग आणि अंमलदार यांना दोन पंचांसह घटनास्थळी बोलावले.
पोलिसांना पाहताच आरोपी कमरअली गुलाम जिलानी सौदागर आणि शहबाज बुटन कुरेशी यांनी अंधाराचा फायदा घेऊन घटनास्थळावरून पळ काढला. पोलिसांनी त्यांचा पाठलाग केला, मात्र ते फरार होण्यात यशस्वी झाले. पोलिसांनी परिसरात चौकशी केली असता, सदर वाडा फैजु फारुक कुरेशी यांचा असल्याचे समोर आले.
घटनास्थळाची आणि वाहनाची पाहणी केली असता, मोठ्या प्रमाणात गोमांस आणि गोमांसाचे अनावश्यक अवयव आढळून आले. तसेच, एक कोयता, एक लोखंडी हुक असलेला वजन काटा, आणि पळून गेलेल्या आरोपींच्या चपलाही जप्त करण्यात आल्या. जप्त केलेल्या मुद्देमालामध्ये अंदाजे रु. ५,००,०००/- किमतीची महिंद्रा झायलो (एमएच ०२ बीएम १५०३) गाडी, रु. ७,५०,०००/- किमतीचे अंदाजे २५०० किलो गोमांस आणि अवयव, एक लोखंडी कोयता, आणि रु. ५,०००/- किमतीचा इलेक्ट्रॉनिक वजन काटा यांचा समावेश आहे. एकूण रु. १२,५५,०००/- किमतीचा मुद्देमाल पोलिसांनी या कारवाईत जप्त केला आहे.
या संदर्भात पोलीस नाईक राहुल डोके यांनी शहर पोलीस ठाण्यात फिर्याद दिली आहे. डोके यांनी दिलेल्या फिर्यादीनुसार, कमरअली गुलाम जिलानी सौदागर, शहबाज बुटन कुरेशी (दोघे रा. जमजम कॉलनी, संगमनेर) आणि त्यांना जागा व लाईटची सुविधा उपलब्ध करून देणारा फैजु फारुक कुरेशी (रा. जमजम कॉलनी, संगमनेर) या तिन्ही आरोपींविरुद्ध भारतीय न्याय संहिता कलम २७१, ३२५, ३(५) सह महाराष्ट्र पशु संरक्षण अधिनियम सन १९९५ (सुधारित २०१५) कलम ५, ५ (क), ९, ९ (अ) सह आर्म ॲक्ट ४/२५ प्रमाणे गुन्हा दाखल करण्यात आला आहे.
