संगमनेर, प्रतिनिधी:
संगमनेर शहरात सांडपाणी प्रकल्पाच्या भूमिगत गटार साफसफाई दरम्यान झालेल्या भीषण दुर्घटनेत एका कर्मचाऱ्यासह स्थानिक तरुणाला आपला जीव गमवावा लागला आहे. कोल्हेवाडी रोडवरील नॅशनल इंग्लिश मीडियम स्कूलजवळ गुरुवारी दुपारी तीन वाजेच्या सुमारास ही दुर्दैवी घटना घडली. या प्रकरणी संगमनेर नगरपालिकेच्या एसटीपी प्रकल्पाचे मुख्य ठेकेदार मे. आर. एम. कातोरे अँड कंपनी आणि बी. आर. क्लिनिंगचे ठेकेदार अशा तिघांविरुद्ध संगमनेर शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, संगमनेर नगरपालिकेने सांडपाणी व्यवस्थापनासाठी एसटीपी प्रकल्प हाती घेतला आहे. या अंतर्गत शहरात भूमिगत गटारांचे जाळे टाकण्यात आले आहे. गुरुवारी दुपारी कोल्हेवाडी रोडवरील गटार साफसफाईचे काम सुरू असताना ही दुर्घटना घडली होती. गटारात उतरलेल्या अतुल रतन पवार (वय १९, रा. संजय गांधीनगर, संगमनेर) या कर्मचाऱ्याचा गुदमरून मृत्यू झाला. त्याला वाचवण्यासाठी गेलेला रियाज जावेद पिंजारी (वय २१, रा. मदिनानगर, संगमनेर) हा तरुणही गटारात गुदमरला आणि त्याचाही उपचारादरम्यान दुर्दैवी मृत्यू झाला.
या प्रकरणी संगमनेर नगरपालिकेचे आरोग्य अधिकारी अमजद बशीर पठाण यांनी संगमनेर शहर पोलिस ठाण्यात मध्यरात्री एक वाजता फिर्याद दिली आहे. त्यांच्या फिर्यादीनुसार, एसटीपी प्लांटचे मुख्य ठेकेदार मे. आर. एम. कातोरे अँड कंपनीचे रामहरी मोहन कातोरे आणि निखिल रामहरी कातोरे (दोघे रा. गोविंद नगर, संगमनेर) तसेच बी. आर. क्लिनिंगचे ठेकेदार मुश्ताक बशीर शेख (रा. शिवाजीनगर, संगमनेर) या तिघांविरुद्ध गुन्हा दाखल करण्यात आला आहे.
मिळालेल्या माहितीनुसार, संबंधित ठेकेदारांनी नगरपालिकेशी केलेल्या करारनाम्यातील अटी व शर्तींचे उल्लंघन केले आहे. एसटीपी प्लांटच्या भूमिगत गटारींच्या साफसफाईचे काम करणाऱ्या कर्मचाऱ्यांच्या सुरक्षिततेबाबत कोणतीही योग्य ती काळजी घेतली नाही. तसेच, आरोग्य विभागाची पूर्वपरवानगी न घेता आणि आवश्यक सुरक्षा साधनांशिवाय मजुरांना गटारात उतरवले. यामुळे कर्मचाऱ्याचा मृत्यू होऊ शकतो याची जाणीव असतानाही निष्काळजीपणाचे कृत्य केल्याचा आरोप त्यांच्यावर आहे.
या घटनेमुळे शहरातील कामाच्या पद्धतींबाबत गंभीर प्रश्न निर्माण झाले आहेत. भारतीय न्याय संहिता २०२३ च्या कलम १०५, १२५(अ), १२५(ब), ३(५) नुसार गुन्हा दाखल करण्यात आला असून, अद्याप कोणालाही अटक करण्यात आलेली नाही. त्यामुळे या प्रकरणात रामहरी कातोरे पिता-पुत्रांसह बी. आर. क्लिनिंगचे ठेकेदार शेख यांना अटक होणार का, हे पाहणे महत्त्वाचे ठरणार आहे. पुढील तपास संगमनेर शहर पोलीस निरीक्षक रवींद्र देशमुख यांच्या मार्गदर्शनाखाली सुरू आहे.
