गुळातील भेसळ: अन्न व औषध प्रशासनाविरोधात ढमाले यांचे गुरुवारपासून प्रांताधिकारी कार्यालयासमोर आमरण उपोषण

महाराष्ट्र संवाद न्यूज ऑनलाईन

संगमनेर, प्रतिनिधी: आरोग्याला बाधा निर्माण होऊन देखील शहरातील गुळातील भेसळीच्या विरोधात अन्न व औषध प्रशासनाचे (FDA) अधिकारी कोणतीही कारवाई करत नसल्याचा आरोप करत संगमनेर शहरातील सामाजिक कार्यकर्ते शंकर रावसाहेब ढमाले गुरुवारपासून (२८ ऑगस्ट) प्रशासनाच्या विरोधात आमरण उपोषण करणार आहे.

ढमाले यांनी ‘महाराष्ट्र संवाद न्यूज’शी बोलताना सांगितले की, शहरातील सिद्धी गुळ नैसर्गिक गुळ नावाने विकल्या जाणाऱ्या मोहनलाल बन्सीलाल दर्डा यांच्या दुकानातून मी गुळ खरेदी केला होता. तो खाल्ल्यानंतर माझ्या घरात दोन व्यक्ती आजारी पडल्या आणि त्यांना रुग्णालयात ॲडमिट करावे लागले. त्यामुळे या गुळात भेसळ असल्याचा संशय आल्याने मी नगर येथील अन्न व औषध प्रशासन विभागाकडे तक्रार दाखल केली होती.

ढमाले यांनी तक्रारीसोबत FDA ला त्यांनी खाजगी लॅब मध्ये तपासणी केलेला गुळातील भेसळीचा अहवाल देखील दिला होता, मात्र त्यानंतर संबंधित विभागाच्या अधिकाऱ्यांकडून कोणतीही कारवाई करण्यात आली नाही. त्यामुळे ढमाले यांनी माहिती अधिकारांतर्गत कारवाईची माहिती मागितली, तेव्हा ती दोन वेळा नाकारण्यात आली. त्यानंतर त्यांनी नाशिक येथील वरिष्ठ अधिकाऱ्यांकडे अपील केले.

अन्न व औषध प्रशासनाच्या अधिकाऱ्यांकडून या प्रकरणावर पडदा टाकण्याचा प्रयत्न सुरू असल्याचे लक्षात आल्याने ढमाले यांनी थेट या विरोधात आता उपोषणाचा निर्णय घेतला आहे. गुळातील भेसळी सोबतच संगमनेर शहरात आणि तालुक्यात भेसळीचे आणखी सात ते आठ प्रकरणे आहेत. त्यांच्याबद्दलही तक्रारी करण्यात आल्या आहेत, पण या विभागाकडून कोणत्याही प्रकारची कारवाई केली गेलेली नाही. त्यामुळे हे अधिकारी भेसळयुक्त उत्पादकांच्या मालकांना पाठीशी घालत आहेत. यात काहीतरी काळेबेरे असल्याची शक्यता आहे, असा गंभीर आरोप ढमाले यांनी केला.

प्रशासनाकडून आपल्याला न्याय मिळणार नाही, असे वाटल्याने अखेरीस प्रशासनाकडे दाद मागण्यासाठी प्रांताधिकारी कार्यालयासमोर गुरुवारपासून आमरण उपोषणाला बसणार आहे, असे ढमाले यांनी सांगितले. दरम्यान भेसळखोरांना पाठीशी घालणाऱ्या अधिकाऱ्यांकडून आता याप्रकरणी कोणती पावले उचलली जातात याकडे लक्ष लागले आहे.