कंटेनरच्या भीषण धडकेत दुचाकीस्वाराचा मृत्यू; संगमनेर येथे अपघात

संगमनेर: संगमनेर-कोपरगाव रस्त्यावर भरधाव वेगाने जाणाऱ्या एका कंटेनरने दुचाकीला जोरदार धडक दिल्याने एका तरुणाचा जागीच मृत्यू झाल्याची दुर्दैवी घटना घडली आहे. गुरुवारी (काल) दुपारी सव्वा दोन वाजण्याच्या सुमारास तालुक्यातील तिगाव परिसरात हा अपघात झाला.

अर्जुन सचिन लोणारी (वय २९, रा. जोर्वे, ता. संगमनेर) असे अपघातात मृत्यू झालेल्या तरुणाचे नाव आहे. अर्जुन लोणारी हे आपल्या दुचाकीने (क्र. एम.एच. १५ ए.सी. ८८९३) तळेगाव दिघे येथील महाविद्यालयाकडे जात असताना हा अपघात झाला.

प्राप्त माहितीनुसार, दुपारी सव्वा दोनच्या सुमारास तिगाव परिसरात समोरील दिशेने येणाऱ्या कंटेनर क्रमांक (एन. एल. ०१ ए. के. २३८८) वरील चालकाने अर्जुन यांच्या दुचाकीला भीषण धडक दिली. या अपघातात अर्जुन गंभीर जखमी झाले. त्यांच्या डोक्याला जबर मार लागल्याने त्यांना तातडीने उपचारासाठी संगमनेर येथील रुग्णालयात दाखल करण्यात आले. मात्र, वैद्यकीय अधिकाऱ्यांनी तपासणीनंतर त्यांना मृत घोषित केले.

या घटनेनंतर संदिप श्रीपत इंगळे यांनी संगमनेर तालुका पोलीस ठाण्यात फिर्याद दाखल केली आहे. त्यानुसार, पोलिसांनी कंटेनर चालक अवनिशकुमार लक्ष्मण सिंग (वय ३५, रा. बरहिया बरनलाल, जि. मैनपुरी, उत्तरप्रदेश) याला अटक केली असून त्याच्याविरुद्ध गुन्हा दाखल करण्यात आला आहे.

या अपघाताचा पुढील तपास संगमनेर तालुका पोलीस करत आहेत.