‘कौन बनेगा नगराध्यक्ष?’ संगमनेर नगराध्यक्षपदाचे आरक्षण आज निश्चित होणार; राजकीय धुरिणांचे लक्ष

संगमनेर: आगामी संगमनेर नगरपरिषदेच्या निवडणुकीसाठी भावी नगराध्यक्षांची निवड थेट जनतेतून होणार असल्याचे स्पष्ट झाल्यानंतर, आज (सोमवार, ०६ ऑक्टोबर) होणाऱ्या आरक्षण सोडतीकडे संपूर्ण संगमनेरकरांचे तसेच इच्छुक उमेदवारांचे आणि राजकीय पक्षांच्या धुरिणांचे लक्ष लागले आहे. आजच्या सोडतीत नगराध्यक्षपद कोणत्या प्रवर्गासाठी राखीव होणार, यावर आता निवडणुकीची पुढील दिशा ठरणार आहे.

नगराध्यक्षपदाच्या आरक्षणाबाबत गेल्या अनेक दिवसांपासून विविध राजकीय आडाखे बांधले जात होते. मात्र, आजच्या सोडतीमुळे हे सर्व आडाखे संपुष्टात येणार आहेत. ज्या प्रवर्गासाठी हे पद आरक्षित होईल, त्या प्रवर्गातील इच्छुकांमध्ये उमेदवारी मिळवण्यासाठी मोर्चेबांधणीला आणि प्रयत्नांना तात्काळ वेग येईल.

राज्यातील २४७ नगरपरिषदा आणि १२७ नगरपंचायतींच्या नगराध्यक्षपदांचे आरक्षण आज निश्चित केले जाणार आहे. ही सोडत मुंबईतील मंत्रालयाच्या सहाव्या मजल्यावरील परिषद सभागृहात काढण्यात येणार आहे. या संदर्भात विभागाकडून सर्व राजकीय पक्षांच्या अध्यक्ष आणि सचिवांना रितसर पत्र पाठवण्यात आले आहे.

आरक्षण निश्चित झाल्यानंतर, आगामी स्थानिक स्वराज्य संस्थांच्या निवडणुकीच्या दृष्टीने राजकीय हालचालींना प्रचंड वेग येईल. सध्या तरी सर्वच प्रवर्गातील संभाव्य इच्छुकांनी तयारी सुरू केली आहे. मात्र, आज आरक्षण जाहीर झाल्यानंतर, आरक्षित प्रवर्गातील इच्छुकांच्या संख्येत लक्षणीय वाढ होणार आहे.

इच्छुकांच्या वाढत्या संख्येमुळे उमेदवारी निश्चित करताना पक्षश्रेष्ठींसमोर मोठी डोकेदुखी वाढणार आहे. आरक्षित प्रवर्गात योग्य, सक्षम आणि विजयी होऊ शकणाऱ्या उमेदवाराचा शोध घेणे, हे मोठे आव्हान आता सर्वच राजकीय पक्षांसमोर असेल.