अहिल्यानगर जिल्हा बँक निवडणूक अपडेट: विखे, राजळे, लहामटे अन् जगतापांच्या अर्जांवर हरकती; निकालाकडे जिल्ह्याचे लक्ष, छाननी दरम्यान काय घडले….

महाराष्ट्र संवाद न्यूज ऑनलाईन-

अहिल्यानगर जिल्हा मध्यवर्ती सहकारी बँकेच्या पंचवार्षिक निवडणुकीची रणधुमाळी आता रंगात आली असून, उमेदवारी अर्जांच्या छाननीदरम्यान मातब्बर नेत्यांच्या अर्जांवर परस्परांनी घेतलेल्या हरकतींमुळे राजकीय वातावरण चांगलेच तापले आहे. माजी खासदार डॉ. सुजय विखे, आमदार किरण लहामटे, आमदार मोनिका राजळे तसेच माजी आमदार राहुल जगताप यांच्या पत्नी डॉ. प्रणोती जगताप यांच्यासह अनेक प्रमुख उमेदवारांविरोधात मंगळवारी जोरदार आक्षेप नोंदवण्यात आले. 

उमेदवारी अर्जांच्या छाननीची व हरकतींवरील सुनावणीची प्रक्रिया पूर्ण झाली असून, याचा अधिकृत निकाल बुधवारी सकाळी ११ वाजता जाहीर केला जाणार असल्याची माहिती निवडणूक निर्णय अधिकारी तथा जिल्हा उपनिबंधक मंगेश सुरवसे यांनी दिली.

बँकेच्या निवडणुकीसाठी एकूण ३६९ उमेदवारी अर्ज दाखल झाले आहेत. मंगळवारी सकाळी निवडणूक निर्णय अधिकारी मंगेश सुरवसे, सहायक निवडणूक अधिकारी देविदास घोडेचोर व रावसाहेब खेडकर यांच्या उपस्थितीत मतदारसंघनिहाय अर्जांची पडताळणी सुरू झाली. उमेदवारी अर्जासोबत आवश्यक कागदपत्रे, सूचक व अनुमोदकांच्या स्वाक्षऱ्या यांची बारकाईने तपासणी केली जात होती.

ज्या उमेदवारांच्या अर्जात त्रुटी होत्या, त्यांना दुपारपर्यंत कागदपत्रे सादर करण्याची मुभा देण्यात आली होती. त्यानंतर सायंकाळी उशिरापर्यंत हरकतींवर सुनावणी चालली. या प्रक्रियेसाठी उमेदवार, त्यांचे सूचक आणि वकिलांची निवडणूक कार्यालयात मोठी गर्दी झाली होती.

छाननीदरम्यान अनेक महत्त्वाच्या मतदारसंघांत एकमेकांविरोधात तक्रारींचा पाऊस पडला. राहता सेवा सोसायटी मतदारसंघातून माजी खासदार सुजय विखे आणि त्यांचे प्रतिस्पर्धी उमेदवार एकनाथ चंद्रभान घोगरे यांनी एकमेकांच्या अर्जावर हरकती घेतल्या. विखे हे राहुरी कारखान्यासाठी घेतलेल्या कर्जाचे थकबाकीदार आहेत, असा आरोप घोगरे यांनी वकील सुरेश लगड यांच्यामार्फत केला. तर दुसरीकडे, घोगरे यांच्या अर्जावरील सूचकाने स्वतःची स्वाक्षरी नाकारल्याने अधिकाऱ्यांनी त्यांचा ‘इन कॅमेरा’ जबाब नोंदवून घेतला.

दुसऱ्या एका महत्त्वाच्या घडामोडीत, माजी मंत्री बाळासाहेब थोरात यांचे जावई रणजीतसिंह देशमुख यांनी त्यांचे प्रतिस्पर्धी उमेदवार चित्रा विठ्ठल गायकवाड यांच्या अर्जावर आक्षेप घेतला. गायकवाड यांच्या सूचकाने अर्जावरील सही माझी नाही असे अधिकाऱ्यांसमोर स्पष्ट केल्यामुळे देशमुख हे बिनविरोध निवडून येण्याची शक्यता वर्तवली जात आहे.

पाथर्डी-शेवगाव मतदारसंघातून आमदार मोनिका राजळे यांच्या अर्जावर प्रतिस्पर्धी उमेदवार कडूचंद शेटे यांनी वकील गोरक्ष पालवे यांच्यामार्फत हरकत नोंदवली. आमदार राजळे या वृद्धेश्वर साखर कारखान्याच्या थकबाकीदार असल्याचा दावा त्यांनी केला आहे.

अकोले मतदारसंघातून आमदार डॉ. किरण लहामटे यांच्याविरोधात माजी आमदार वैभव पिचड यांनी बनावट अनुभवाचे प्रमाणपत्र जोडल्याची हरकत घेतली; मात्र हा आक्षेप पूर्णपणे चुकीचा असल्याचे लहामटे यांनी स्पष्ट केले.

श्रीगोंदा मतदारसंघातून माजी आमदार राहुल जगताप यांच्या पत्नी डॉ. प्रणोती जगताप यांच्या अर्जावर माजी मंत्री बबनराव पाचपुते यांचे चिरंजीव प्रतापसिंह पाचपुते यांनी कारखाना थकबाकीत असल्याचे कारण देत आक्षेप घेतला. यावर जगताप यांच्या वकिलांनी खुलासा सादर केला आहे.

या प्रमुख हरकतींव्यतिरिक्त, भारतीय रिझर्व बँकेच्या नियम नियमावलीनुसार सलग १० वर्षे संचालकपदावर राहिलेल्या व्यक्तींना पुन्हा निवडणूक लढवता येईल की नाही, या मुद्द्यावरही सर्वांचे लक्ष लागले आहे. या नियमाच्या कक्षेत जिल्हा बँकेचे माजी संचालक सिताराम गायकर, माजी आमदार चंद्रशेखर घुले आणि माजी संचालक अंबादास पिसाळ हे येतात. विशेष म्हणजे त्यांच्या अर्जावर कोणत्याही प्रतिस्पर्धी उमेदवाराने थेट आक्षेप घेतलेला नाही, तरीही त्यांचा अर्ज वैध ठरतो की अवैध, याकडे सर्वांचे लक्ष आहे.

या सर्व हरकती आणि कायदेशीर मुद्द्यांवर निवडणूक निर्णय अधिकारी बुधवारी सकाळी ११ वाजता आपला अंतिम निकाल स्पष्ट करणार आहेत.