सूचकांच्या एका निर्णयाने जिल्हा बँकेच्या निवडणुकीला नवा ट्विस्ट; संगमनेर-राहात्यातील समीकरणे घडली, विखे-देशमुखांच्या गुलालाचा मार्ग मोकळा?

महाराष्ट्र संवाद न्यूज ऑनलाईन-

अहिल्यानगर जिल्हा मध्यवर्ती सहकारी बँकेच्या निवडणुकीत बिनविरोधाचा फॉर्म्युला राबविण्याच्या हालचाली सुरू असताना संगमनेर आणि राहाता तालुक्यातील घडामोडींनी या निवडणुकीला नवे वळण मिळाले आहे. उमेदवारी अर्ज दाखल करण्याच्या प्रक्रियेत विरोधी उमेदवारांच्या सूचकांनी केलेली सही आपली नसल्याचे इन कॅमेरा निवडणूक अधिकाऱ्यांना सांगितले आहे. यामुळे या दोन्ही जागा आता बिनविरोधच्या मार्गावर आहे.

जिल्हा बँकेची निवडणूक बिनविरोध व्हावी, यासाठी संगमनेरमध्ये ज्येष्ठ नेते बाळासाहेब थोरात यांच्या पुढाकाराने सर्वपक्षीय चर्चेला सुरुवात झाली होती. थोरात आणि सुजय विखे यांच्यासह जिल्ह्यातील प्रमुख नेत्यांनी सहकार क्षेत्रातील ही निवडणूक टाळण्यासाठी एकमताचा मार्ग काढण्याचा प्रयत्न केला. मात्र, त्यानंतर विविध राजकीय पक्ष आणि स्थानिक नेत्यांनी स्वतंत्रपणे उमेदवारी अर्ज दाखल केल्याने बिनविरोध निवडणुकीच्या प्रयत्नांना धक्का बसला असला तरी सुरुवातीच्या टप्प्यातच अनेक जागा बिनविरोध होण्याच्या मार्गावर आहे.

याच पार्श्वभूमीवर संगमनेर आणि राहाता तालुक्यातील सूचकांच्या भूमिकेला विशेष महत्त्व प्राप्त झाले आहे. संबंधित उमेदवारी अर्जांमध्ये सूचक म्हणून सही करण्याच्या प्रक्रियेत निर्माण झालेल्या पेचामुळे काही उमेदवारांचे राजकीय गणित अडचणीत आले आहे. हा केवळ कागदोपत्री अडथळा नसून त्यामागे स्थानिक पातळीवरील राजकीय समीकरणे दडलेली असल्याची चर्चा सहकार वर्तुळात सुरू झाली आहे. थोरात-विखे यांचा अहिल्यानगर जिल्ह्यावर मोठा प्रभाव आहे.

विशेष म्हणजे, संगमनेर तालुका हा जिल्हा बँकेच्या निवडणुकीतील सर्वाधिक प्रभावी तालुक्यांपैकी एक आहे. सोसायटी, बिगरशेती आणि शेतीपूरक या प्रमुख मतदारसंघांत संगमनेरचे मोठे संख्याबळ असल्याने येथील प्रत्येक निर्णयाचा जिल्हास्तरीय निकालावर परिणाम होऊ शकतो. त्यामुळे संगमनेरमध्ये कोणाच्या बाजूने किती मतांचे ध्रुवीकरण होते, याकडे संपूर्ण जिल्ह्याचे लक्ष लागले आहे.

दुसरीकडे राहाता तालुकाही पालकमंत्री राधाकृष्ण विखे पाटील यांच्या राजकीय प्रभावामुळे जिल्हा बँकेच्या निवडणुकीत महत्त्वाचा मानला जातो. संगमनेर आणि राहाता या दोन तालुक्यांतील घडामोडींचा परिणाम सुजय विखे आणि रणजीतसिंह देशमुख यांच्या संभाव्य राजकीय समीकरणांवर होणार आहे.

दरम्यान, रणजीतसिंह देशमुख यांच्या विरोधात उमेदवारी अर्ज दाखल केलेल्या चित्रा गायकवाड यांच्या सूचकांनी उमेदवारी अर्जावर केलेली सही आपली नसल्याचे, तसेच डॉ. सुजय विखे यांच्या विरोधात उमेदवारी अर्ज दाखल केलेल्या एकनाथ घोगरे यांच्या सूचकाने अर्जावरील सही आपली नसल्याचे निवडणूक अधिकाऱ्यांच्या निदर्शनास आणून दिले आहे.

जिल्हा बँकेच्या निवडणुकीसाठी अखेरच्या टप्प्यात मोठ्या प्रमाणावर उमेदवारी अर्ज दाखल झाले असून निवडणुकीतील चुरस वाढली आहे. त्यामुळे बिनविरोधाचा मार्ग प्रत्यक्ष निवडणुकीकडे वळतो की शेवटच्या क्षणी पुन्हा राजकीय समझोता होतो, याकडे आता सहकार क्षेत्रासह संपूर्ण अहिल्यानगर जिल्ह्याचे लक्ष लागले आहे.