अहिल्यानगर – शहरात विनापरवाना फ्लेक्स लावून शहर विद्रूप करणाऱ्यांवर अहिल्यानगर महानगरपालिकेने कारवाईचा बडगा उगारला आहे. प्रेमदान चौक आणि नागापूर पुलाजवळ अनधिकृत फ्लेक्स लावल्याप्रकरणी मनपाने संबंधितांविरुद्ध तोफखाना पोलिस ठाण्यात फिर्याद दिली असून गुन्हा दाखल करण्यात आला आहे.
मनपा आयुक्त तथा प्रशासक यशवंत डांगे यांनी या संदर्भात कठोर भूमिका घेतली असून, ‘परवानगीशिवाय फ्लेक्स लावून विद्रुपीकरण केल्यास यापुढे फौजदारी आणि दंडात्मक अशा दोन्ही स्वरूपाच्या कठोर कारवाया केल्या जातील,’ असा स्पष्ट इशारा त्यांनी दिला आहे.
सावेडी प्रभाग कार्यालयाचे प्रभाग अधिकारी बाळासाहेब लक्ष्मण पवार यांनी याप्रकरणी फिर्याद दिली आहे. त्यांच्या फिर्यादीनुसार, अहिल्यानगर-मनमाड रोडवरील प्रेमदान चौकात रस्त्याच्या मध्यभागी असलेल्या लाईटच्या खांबाला ‘मंगलमुर्ती वास्तु प्रा. लि.’ या नावाचा फ्लेक्स बोर्ड बेकायदेशीरपणे लावण्यात आला होता. तसेच, नागापूर येथे पुलाच्या बाजूला रस्त्याच्या मध्यभागी लाईटच्या खांबाला ‘आकाश कातोरे यांना वाढदिवसाच्या शुभेच्छा’ असा फ्लेक्स बोर्ड देखील लावण्यात आला होता. महानगरपालिकेच्या पथकाने हे दोन्ही फ्लेक्स बोर्ड काढून जप्त केले आहेत.
अनधिकृत फ्लेक्स लावल्याप्रकरणी उच्च न्यायालयाच्या आदेशानुसार संबंधितांवर गुन्हा दाखल करण्यात आला आहे. शहरातील नागरिकांनी विनापरवाना फ्लेक्स लावू नयेत, असे आवाहन मनपाकडून वारंवार करण्यात येत आहे. यापुढेही अनधिकृत फ्लेक्स आढळल्यास कोणत्याही प्रकारची दया न दाखवता फौजदारी व दंडात्मक अशा दुहेरी कारवाया केल्या जातील, असे आयुक्त डांगे यांनी स्पष्ट केले आहे.
Post Views: 689
