संगमनेर – वॉटरपार्क आणि थीमपार्कच्या माध्यमातून देशभरात नावलौकिक मिळवणाऱ्या मालपाणी उद्योग समूहाने आता संगमनेरच्या मनोरंजन क्षेत्रात दमदार पाऊल टाकले आहे. शहराच्या सांस्कृतिक जीवनात गेल्या अनेक वर्षांपासून जाणवणारी अत्याधुनिक चित्रपटगृहाची पोकळी भरून काढत, या उद्योग समूहाने दोन पडद्यांचा समावेश असलेल्या ‘मालपाणी मल्टिप्लेक्स’ची उभारणी केली आहे.
आज (शुक्रवार, दि. १७) सायंकाळी या मल्टिप्लेक्सचा भव्य शुभारंभ होत आहे. या नव्या मल्टिप्लेक्समुळे दर्जेदार चित्रपट पाहण्यासाठी संगमनेरकरांना लोणी किंवा नाशिक येथे करावी लागणारी ‘वारी’ आता थांबणार आहे.
‘गाय छाप’मुळे देशात परिचित असलेल्या मालपाणी उद्योग समूहाने गेल्या दोन दशकांत वॉटरपार्क आणि थीमपार्कच्या क्षेत्रात मोठी व्यावसायिक क्रांती घडवली आहे. शिर्डी येथील वॉटरपार्कपासून सुरू झालेला हा प्रवास आशिया खंडातील सर्वात मोठ्या ‘इमेजीका वर्ल्ड’पर्यंत, तसेच मध्य प्रदेशातील इंदूर आणि गुजरातमधील सुरतपर्यंत पोहोचला आहे.देशाच्या प्रगतीमध्ये महत्त्वाचा वाटा उचलणाऱ्या मालपाणी समूहाने नेहमीच आपल्या मूळ शहराप्रती असलेली सामाजिक जाणीव जपली आहे.
याच जाणिवेतून, संगमनेरकरांना दीर्घकाळापासून अपेक्षित असलेल्या या मनोरंजन गृहाची निर्मिती करण्यात आली आहे. या मल्टिप्लेक्समध्ये प्रेक्षकांना मोठ्या पडद्यावर एकाचवेळी दोन वेगवेगळे चित्रपट पाहण्याचा पर्याय उपलब्ध होणार आहे. आकर्षक डिजिटल ध्वनी प्रणाली, उत्कृष्ट अंतर्गत रचना आणि भव्य रुपेरी पडदा यामुळे चित्रपट पाहताना प्रेक्षकांना एक अविस्मरणीय अनुभूती मिळेल, असा विश्वास मालपाणी परिवाराला आहे.
दिवाळीच्या पहिल्या दिवसाचा शुभ मुहूर्त साधून, मालपाणी परिवारातील ज्येष्ठ सदस्या श्रीमती ललिता मालपाणी आणि श्रीमती सुवर्णा मालपाणी यांच्या हस्ते आज ‘मालपाणी मल्टिप्लेक्स’चा औपचारिक शुभारंभ होणार आहे.
