नशेच्या इंजेक्शन पाठोपाठ पोलिसांची कारवाई! संगमनेर शहरात गांजा विक्री करणाऱ्यास अटक; २६९५० रुपयांचा मुद्देमाल जप्त!

संगमनेर – अवैध धंद्यामुळे आधीपासूनच चर्चेत असलेल्या संगमनेरमध्ये थेट नशेच्या इंजेक्शनची होणारी विक्री समोर आल्यानंतर आता सोमवारी पोलिसांनी केलेल्या कारवाईत गांजासारखा अमली पदार्थ जवळ बाळगून त्याची चोरटी विक्री करणाऱ्या एका आरोपीला जेरबंद करण्यात यश आले आहे. या संदर्भात दोघांवर गुन्हा दाखल करण्यात आला असून एका आरोपीला अटक करण्यात आली आहे. 

गेल्या आठवड्यामध्ये संगमनेरमध्ये पोलिसांनी राबविलेल्या स्ट्रिंग ऑपरेशनमध्ये नशेचे इंजेक्शन्स विक्री होत असल्याचे समोर आले होते. आदित्य किशोर गुप्ता याला पोलिसांनी पकडल्यानंतर या प्रकरणाचे राजकीय कनेक्शन आणि पोलिसांवर मोठा राजकीय दबाव आल्याचे समोर आल्याने हा विषय शहरात चर्चेचा विषय ठरला. दबावानंतरही पोलिसांनी केलेली कारवाई शहरात कौतुकाचा विषय ठरली होती. गेल्या काही दिवसांपासून संगमनेरमध्ये अवैध व्यावसायिकांनी डोके वर काढले आहे. यामुळे संगमनेरचे सामाजिक स्वास्थ बिघडण्याची चिन्हे निर्माण झाली असतानाच शहर पोलिसांनी केलेल्या कारवाईत एका गांजा विक्रेत्याला पकडण्यात आले आहे तर दुसरा फरार आहे.

सोमवारी (०३ नोव्हेंबर) सायंकाळी साडेपाचच्या सुमारास मदिनानगर, पाच पीरबाबा, संगमनेर येथील एका बंद घराच्या आडोश्याला ही कारवाई करण्यात आली. या प्रकरणी अबरार रउफ शेख (वय ४६ वर्षे, रा. अलका नगर, संगमनेर) या आरोपीस ताब्यात घेऊन अटक करण्यात आली आहे. आरोपी अबरार शेख हा १५३८ ग्रॅम वजनाचा गांजा कब्जात बाळगून त्याची विक्री करताना मिळून आला. 

चौकशीदरम्यान त्याने सांगितले की, सदरचा गांजा नासिर मोहम्मद शेख (वय ४० वर्षे, रा. संगमनेर) या दुसऱ्या आरोपीने कुठूनतरी प्राप्त करून आणून दिला होता. याप्रकरणी संगमनेर शहर पोलीस स्टेशनमध्ये गु.र.नं. ९७८/२०२५ अन्वये अमली औषधी द्रव्य मन प्रभावी पदार्थ अधिनियम १९८५ चे कलम ८ (क), सह २० (क), (२) (क), प्रमाणे गुन्हा दाखल करण्यात आला आहे.

जप्त मुद्देमालाची एकूण किंमत अंदाजे २६,९५०/- रुपये असून या कारवाईत पोलिसांनी २०,०००/- किमतीचा १२१० ग्रॅम वजनाचा काळपट व हिरवट रंगाची पाने, फुले, काड्या व बिया असलेला उग्र वास येणारा सुकलेला सुट्टा गांजा (कॅनाबीस) प्लॅस्टिकच्या पिशवीतून जप्त केला. तसेच, ५,२००/- किमतीच्या ३२८ ग्रॅम वजनाच्या २६ गांजाच्या पुड्या (कॅनाबीस वनस्पतीचे शेंडे) जप्त करण्यात आल्या. याव्यतिरिक्त, रोख १७५०/- रुपयेदेखील आरोपीकडून हस्तगत करण्यात आल्या आहेत. जप्त केलेल्या गांज्याचे एकूण वजन १५३८ ग्रॅम होते.

पोलीस अधीक्षक सोमनाथ घार्गे, अपर पोलीस अधीक्षक सोमनाथ वाघचौरे, पोलीस उपअधीक्षक डॉ. कुणाल सोनवणे यांच्या मार्गदर्शनाखाली संगमनेर शहर पोलीस ठाण्याचे पोलीस निरीक्षक रविंद्र देशमुख यांच्या नेतृत्वाखालील पथकाने ही उल्लेखनीय कामगिरी केली असल्याचे सांगितले जात असून या पथकात पोलीस उपनिरीक्षक श्रीकांत सावंत, पोलीस हेड कॉन्स्टेबल बाबासाहेब सातपुते, पोलीस कॉन्स्टेबल विजय आगलावे, पोलीस कॉन्स्टेबल विजय खुळे, पोलीस कॉन्स्टेबल अजित कुऱ्हे, पोलीस कॉन्स्टेबल राहुल पांडे, पोलीस कॉन्स्टेबल राहुल क्षीरसागर आणि पोलीस कॉन्स्टेबल रामकिसन मुकरे यांचा समावेश होता. पुढील तपास संगमनेर शहर पोलीस करत आहे.