बिबट्यांच्या हल्ल्यांना प्रतिबंध: जिल्हा नियोजन व विकास समितीच्या माध्यमातून अहिल्यानगरमध्ये ११५० बिबट्यांसाठी ८ कोटी १३ लाखांचा निधी!

अहिल्यानगर – 

अहिल्यानगर जिल्ह्यात बिबट्यांची वाढती संख्या आणि त्यांच्या हल्ल्यांमुळे निर्माण झालेली गंभीर परिस्थिती लक्षात घेऊन, जिल्हा नियोजन व विकास समितीने प्रतिबंधात्मक उपाययोजनांसाठी मोठा निधी मंजूर केला आहे. जिल्ह्याचे पालकमंत्री तथा जलसंपदामंत्री डॉ. राधाकृष्ण विखे पाटील यांनी याबाबत माहिती दिली आहे.

जिल्ह्यात तब्बल ११५० बिबटे असल्याची माहिती प्राप्त झाली आहे. या बिबट्यांच्या हल्ल्यांना आळा घालण्यासाठी आणि नागरिकांचे संरक्षण करण्यासाठी ८ कोटी १३ लाख ४४ हजार रुपये एवढा निधी तातडीने उपलब्ध करून देण्यात आला आहे.

पालकमंत्री डॉ. विखे पाटील यांनी गेल्या दोन दिवसांपासून जिल्हाधिकारी आणि वन विभागाशी सतत संपर्क साधून परिस्थितीचा आढावा घेतला. तसेच, त्यांनी वनमंत्री गणेश नाईक यांच्याशी चर्चा करून जिल्ह्यासाठी आवश्यक असणारी अतिरिक्त यंत्रसामग्री तातडीने उपलब्ध करून देण्यास सांगितले आहे.

उपलब्ध निधीतून वन विभागाला आवश्यक असणारी अत्याधुनिक उपकरणे व वाहने खरेदी करण्याचे निर्देश देण्यात आले आहेत. यामध्ये ३०० पिंजरे आणि ३०० ट्रॅप कॅमेरे खरेदी केले जातील. तसेच, जॅकेट, शूज, टॉर्च गन्स आणि संरक्षणात्मक किट यांसारखी आवश्यक रेस्क्यू उपकरणे खरेदी करण्यात येणार आहेत. बिबट्यांना पकडण्यासाठी आणि स्थलांतरित करण्यासाठी तातडीने २२ रेस्क्यू वाहने खरेदी करण्यासही प्रशासनास सांगण्यात आले आहे.

जिल्ह्यातील ११५० बिबट्यांची संख्या लक्षात घेऊन, त्यांना पकडण्यासाठी विशेष मोहीम राबविण्यात येणार आहे. पकडलेल्या बिबट्यांना वनतारा येथे स्थलांतरित करण्याबाबत वरिष्ठ पातळीवर निर्णय घेण्यात आला आहे. पालकमंत्र्यांनी या सर्व कार्यवाहीची अंमलबजावणी त्वरित करण्याचे निर्देश दिले आहेत. तसेच, जिल्हाधिकाऱ्यांना तालुकानिहाय परिस्थितीचा सविस्तर आढावा घेऊन आवश्यक उपाययोजना राबवण्याचे आदेश दिले आहेत, असे पालकमंत्री डॉ. विखे पाटील यांनी सांगितले.

हा निधी बिबट्यांच्या हल्ल्यांना आळा घालण्यासाठी आणि वन विभाग व स्थानिकांमध्ये समन्वय साधण्यासाठी अत्यंत महत्त्वाचा ठरणार आहे.