संगमनेर (प्रतिनिधी): संगमनेर नगरपरिषद निवडणुकीनंतर ईव्हीएम मशीन सुरक्षित ठेवण्यात आलेल्या क्रीडा संकुलातील स्ट्रॉंग रूमवरील सीसीटीव्ही कॅमेरे अचानकपणे काही वेळासाठी बंद पडल्याने शहरात खळबळ उडाली आहे. प्रशासनाच्या या हलगर्जीपणाबद्दल संगमनेरकरांनी तीव्र नाराजी व्यक्त केली असून, ही माहिती मिळताच उमेदवार आणि त्यांच्या समर्थक कार्यकर्त्यांनी तातडीने घटनास्थळी धाव घेतली आहे. ईव्हीएमच्या सुरक्षेबाबत नागरिकांच्या मनात असलेल्या शंका या घटनेमुळे आणखी गडद झाल्या आहेत.
सहकार महर्षी भाऊसाहेब थोरात क्रीडा संकुलातील स्ट्रॉंग रूममध्ये नगरपालिका निवडणुकीतील सर्व १५ प्रभागांतील ईव्हीएम मशीन कडेकोट बंदोबस्तात ठेवण्यात आले आहेत. सर्व उमेदवार, त्यांचे प्रतिनिधी आणि शासकीय प्रतिनिधी यांच्या समक्ष सील करण्यात आलेल्या या स्ट्रॉंग रूमवर सतत देखरेख ठेवण्यासाठी सीसीटीव्ही कॅमेरे लावण्यात आले होते.
मात्र, आज रविवारी, (७ डिसेंबर) हे सीसीटीव्ही कॅमेरे अचानकपणे काही वेळासाठी बंद पडल्याची गंभीर बाब समोर आली. ही माहिती मिळताच संगमनेर सेवा समितीचे पदाधिकारी व कार्यकर्ते तसेच विविध पक्षांचे उमेदवार आणि त्यांचे प्रतिनिधी मोठ्या संख्येने तातडीने घटनास्थळी दाखल झाले. या घटनेमुळे संपूर्ण शहरात संभ्रम आणि तणावाचे वातावरण निर्माण झाले आहे.
ईव्हीएम मशीन आणि त्याची सुरक्षा ही लोकशाही प्रक्रियेतील अत्यंत महत्त्वाची गोष्ट आहे. देशात आणि राज्यात ईव्हीएमबद्दल पूर्वीपासूनच नागरिकांमध्ये संभ्रम असताना, संगमनेरमध्ये घडलेल्या या प्रकाराने शंकांना अधिक बळ मिळाले आहे. कॅमेरे नेमके कशामुळे बंद पडले, याचे समाधानकारक उत्तर प्रशासनाचे अधिकारी घटनास्थळी उपस्थित असलेल्या उमेदवार आणि कार्यकर्त्यांना देऊ शकले नाहीत. प्रशासनाच्या या हलगर्जीपणाच्या कारभारावर नागरिकांनी क्रीडा संकुलाबाहेर बसून तीव्र नाराजी व्यक्त केली.
सीसीटीव्ही बंद पडण्यामागील स्पष्टीकरण न मिळाल्यास तीव्र आंदोलन छेडण्याचा इशारा यावेळी नागरिकांनी दिला आहे. या घटनेचे पडसाद तालुका आणि जिल्हा स्तरावर उमटले असून, निवडणूक प्रक्रियेच्या पारदर्शकतेवर मोठे प्रश्नचिन्ह निर्माण झाले आहे. या प्रकरणी निवडणूक प्रशासनाने तातडीने खुलासा करून नागरिकांच्या शंका दूर करणे आणि दोषींवर कारवाई करणे आवश्यक आहे. मात्र सदरचे वृत्त लिहीपर्यंत प्रशासनाकडून अधिकृतपणे कोणताही खुलासा करण्यात आलेला नव्हता. तर संगमनेर नगर परिषदेचे मुख्याधिकारी तथा सहाय्यक निवडणूक निर्णय अधिकारी दयानंद गोरे यांनी समाज माध्यमावर टाकलेल्या पोस्टनुसार सीसीटीव्ही रेकॉर्डिंगची हार्ड डिस्क मेमरी भरल्याने बदलण्यात आली. त्यामुळे थोडा गैरसमज झाला. हार्ड डिस्क बदलताना व्हिडिओ शूटिंग करण्यात आले असल्याचे म्हटले आहे.
- माजी नगराध्यक्ष विश्वासराव मुर्तडक यांनी या घटनेबद्दल तीव्र संताप व्यक्त केला आहे. त्यांनी ‘सत्ताधारी काहीही करू शकतात’ असे म्हणत देशात आणि राज्यात सत्ताधारी ईव्हीएमच्या जोरावर निवडणूक जिंकत असल्याचा आरोप सातत्याने होत आहे. त्यातच संगमनेरमध्ये स्ट्रॉंग रूममधील सीसीटीव्ही कॅमेरे एक तास बंद पडणे, हा प्रकार नेमका काय आहे? याचे समाधानकारक उत्तर प्रशासनाने दिले पाहिजे. प्रशासनावर काही वेगळे करण्याचा दबाव तर नव्हता ना, अशी शंका नागरिकांच्या मनात निर्माण झाली असल्याचे म्हटले आहे.
