संगमनेर | महाराष्ट्र संवाद न्यूज:
राज्याचे जलसंपदा मंत्री तथा जिल्ह्याचे पालकमंत्री राधाकृष्ण विखे पाटील आणि आमदार अमोल खताळ यांची सोशल मीडियाच्या माध्यमातून जाणीवपूर्वक बदनामी केल्याचा खळबळजनक प्रकार समोर आला आहे. याप्रकरणी संगमनेर शहर पोलिसांनी ‘संगमनेरचा राजू’ या इन्स्टाग्राम अकाऊंट चालकाविरोधात भारतीय न्याय संहितेनुसार गुन्हा दाखल केला असून पुढील कारवाई सुरू केली आहे.
मिळालेल्या माहितीनुसार, ‘संगमनेरचा राजू’ या इन्स्टाग्राम आयडीवरून मंत्री विखे पाटील आणि आ. अमोल खताळ यांच्या नावाचा वापर करून आक्षेपार्ह सब-टायटलसह काही व्हिडिओ आणि मजकूर प्रसिद्ध करण्यात आला होता. या पोस्टमध्ये दोघांची प्रतिमा मलीन करण्याचा आणि बदनामी करण्याचा जाणीवपूर्वक प्रयत्न करण्यात आल्याने कार्यकर्त्यांच्या भावना दुखावल्या गेल्या.
भाजपचे ज्येष्ठ नेते ॲड. श्रीराम गणपुले यांना १७ डिसेंबर २०२५ रोजी त्यांच्या व्हॉट्सॲपवर या इन्स्टाग्राम अकाऊंटची लिंक मिळाली होती. यातील मजकूर आणि चित्रण अत्यंत आक्षेपार्ह असल्याचे लक्षात येताच, त्यांनी तातडीने शहर पोलीस निरीक्षक समीर बारवकर यांची भेट घेऊन या प्रकरणाची तक्रार केली.
ॲड. गणपुले यांनी दिलेल्या तक्रारीची दखल घेत संगमनेर शहर पोलिसांनी संबंधित इन्स्टाग्राम अकाऊंट चालविणाऱ्या व्यक्तीविरोधात भारतीय न्याय संहिता कलम ३५३ (१) अन्वये गुन्हा दाखल केला आहे. सायबर सेलच्या मदतीने संबंधित अकाऊंट चालकाचा शोध घेऊन त्याच्यावर कठोर कारवाई करण्याची प्रक्रिया सुरू करण्यात आली आहे. 
