श्रीरामपूर | महाराष्ट्र संवाद न्यूज-
अहिल्यानगर जिल्ह्याच्या श्रीरामपूरमध्ये जर्मन बेकरी बॉम्ब स्फोट प्रकरणातील आरोपी बंटी जहागीरदार याची बुधवारी हत्या करण्यात आली. जहागीरदार याची गोळ्या घालून हत्या करणाऱ्या दोन आरोपींना पोलिसांनी अवघ्या २४ तासांत ताब्यात घेतले आहे. ३१ डिसेंबर रोजी दुपारी जर्मन रुग्णालयासमोर झालेल्या या थरारामुळे शहरात मोठी खळबळ उडाली होती.
३१ डिसेंबर २०२५ रोजी दुपारी पावणे तीन वाजेच्या सुमारास, कब्रस्तान परिसरातील जर्मन रुग्णालयासमोर बंटी जहागीरदारवर अज्ञातांनी गोळीबार केला होता. या हल्ल्यात बंटीचा उपचारादरम्यान मृत्यू झाला, तर त्याच्यासोबत असलेला अमिन गुलाब शेख हा गंभीर जखमी झाला आहे. याप्रकरणी श्रीरामपूर शहर पोलीस ठाण्यात भारतीय न्याय संहिता आणि आर्म ऍक्टच्या विविध कलमान्वये गुन्हा दाखल करण्यात आला असून मृतदेहाचे शवविच्छेदन छत्रपती संभाजीनगर येथील घाटी रुग्णालयात करण्यात आले आहे.
पोलीस अधीक्षक सोमनाथ घार्गे आणि अपर पोलीस अधीक्षक सोमनाथ वाकचौरे यांच्या मार्गदर्शनाखाली पोलिसांनी तपासासाठी तीन पथके तैनात केली होती. रात्री उशिरा पोलिसांनी सिद्धार्थनगर येथील कृष्णा अरुण शिनगारे आणि भिमनगर येथील रवींद्र गौतम निकाळजे या दोन तरुणांना नाकाबंदी दरम्यान ताब्यात घेतले आहे. या दोघांची पोलीस प्रशासनाकडून पासून चौकशी सुरू आहे.
यातील मृत बंटी जहागीरदारवर पुणे बॉम्बस्फोटासह १७ गंभीर स्वरूपाचे गुन्हे दाखल होते. या पार्श्वभूमीवर, ही हत्या कोणत्या कारणातून झाली, हत्येचा कट कोणी रचला आणि गुन्ह्यात वापरलेली शस्त्रे कोठून आणली, याचा सखोल तपास डीवायएसपी जयदत्त भवर आणि पोलीस निरीक्षक नितीन देशमुख करत आहेत.
घटनेच्या गांभीर्यामुळे श्रीरामपूर शहरात सध्या मोठा पोलीस बंदोबस्त तैनात करण्यात आला आहे. सोशल मीडियावर देखील पोलिसांचे बारकाईने लक्ष असून कुणीही घटनेबाबत आक्षेपार्ह पोस्ट शेअर केल्यास, चुकीची माहिती प्रसिद्ध केल्यास किंवा अफवा पसरवल्यास त्यांच्यावर कठोर कायदेशीर कारवाई करण्यात येईल, असा इशारा पोलीस प्रशासनाने दिला आहे. नागरिकांनी शांतता राखण्याचे आवाहन करण्यात आले आहे.
