श्रीरामपूर | महाराष्ट्र संवाद न्यूज
अल्पावधीत मोठ्या प्रमाणात परतावा देण्याचे आमिष दाखवून सर्वसामान्य जनतेची फसवणूक करणाऱ्या कंपन्यांविरुद्ध श्रीरामपूर पोलिसांनी मोठी मोहीम हाती घेतली आहे. अहिल्यानगर जिल्ह्यामध्ये अशा अनेक इन्व्हेस्टर कंपन्यांनी नागरिकांची लाखो रुपयांची फसवणूक केल्याप्रकरणी यापूर्वी गुन्हे दाखल आहेत. याच पार्श्वभूमीवर, श्रीरामपूर तालुक्यातील भोकर शिवारामध्ये ‘ग्रो इन्व्हेस्टर’ नावाच्या कंपनीकडून विनापरवाना मोठी आर्थिक गुंतवणूक स्वीकारली जात असल्याची गोपनीय माहिती पोलिसांना प्राप्त झाली होती.
या माहितीची खातरजमा करण्यासाठी अपर पोलीस अधीक्षक, श्रीरामपूर यांच्या कार्यालयातील पथकाने व उपविभागीय पोलीस अधिकारी जयदत्त भवर यांच्यासह पोलीस उपनिरीक्षक सतिष डोळे, पोलीस उपनिरीक्षक दादाभाई मगरे, पोलीस हेड कॉन्स्टेबल दादासाहेब लोंढे, पोलीस नाईक संदिप दरंदले, पोलीस कॉन्स्टेबल सहदेव चव्हाण, पोलीस कॉन्स्टेबल अशोक गाढे, पोलीस नाईक दादासाहेब गुंड, पोलीस नाईक अनिल शेंगाळे, महिला पोलीस कॉन्स्टेबल पुजा भावसार आणि महिला पोलीस कॉन्स्टेबल अरुण पवार यांनी खासगी वाहनाने भोकर शिवारातील हनुमानवाडी येथे छापा टाकला.
या कारवाईत संदिपराज मोहिणीबाई कपाटे (वय ३६ वर्षे, रा. हनुमानवाडी, भोकर शिवार, ता. श्रीरामपूर) याला पथकाने ताब्यात घेतले. पोलिसांनी त्याच्याकडे अधिकृत परवान्याबाबत विचारणा केली असता, लोकांकडून पैसे स्वीकारण्याबाबत कोणताही परवाना नसल्याचे त्याने सांगितले. त्यानंतर त्याच्या घराची झडती घेतली असता पोलिसांना ९ पासबुक, १० चेकबुक, एक हिशोबाची नोंद असलेली वही, १ ॲपल कंपनीचा लॅपटॉप, ३ कॉम्प्युटर स्क्रीन, २ पेन ड्राईव्ह, १ कॅश काउंटिंग मशीन, २ तिजोरी, ३ वॉकीटॉकी, १ H.H.M.D. आणि १,०४,६००/- रुपयांची रोख रक्कम असा मुद्देमाल मिळून आला. इन्व्हेस्टर कंपनीच्या मालकाने या साहित्याबाबत आणि आर्थिक व्यवहाराबाबत कोणताही समाधानकारक खुलासा न केल्यामुळे पंचासमक्ष हा सर्व मुद्देमाल जप्त करण्यात आला आहे.
पोलिसांनी नागरिकांना आवाहन केले आहे की, ज्या-ज्या लोकांनी ‘ग्रो इन्व्हेस्टर’ कंपनीमध्ये जादा परताव्याच्या आमिषाने पैसे गुंतवलेले असतील, त्यांनी स्वतःहून श्रीरामपूर तालुका पोलीस स्टेशन येथे गुंतवणुकीच्या कागदपत्रांसह हजर राहून आपला जबाब नोंदवावा. नागरिकांनी वेळीच पुढे येऊन तक्रार दिल्यास पोलीस तपासाला गती मिळेल आणि संबंधित दोषींविरुद्ध कडक कारवाई करणे सोपे होईल, असे श्रीरामपूर विभागाचे अपर पोलीस अधीक्षक सोमनाथ वाघचौरे यांनी म्हटले आहे.
