मुंबई (वडाळा):
मुंबईतील वडाळा पूर्व येथील आनंदवाडी परिसरात वडिलोपार्जित मालमत्तेच्या वादाने हिंसक वळण घेतले आहे. एका ७० वर्षीय वृद्ध महिलेला तिच्याच नातेवाईक असलेल्या चार महिलांनी घरात घुसून बेदम मारहाण केल्याची खळबळजनक घटना समोर आली आहे. या हल्ल्यात मध्यस्थी करणाऱ्या वृद्धेच्या मुलीलाही आरोपींनी सोडले नाही. याप्रकरणी वडाळा पोलिस ठाण्यात चार महिलांविरुद्ध गुन्हा दाखल करण्यात आला आहे.
तक्रारदार ज्योत्सना राजेंद्र जाधव (४३) यांनी दिलेल्या माहितीनुसार, त्यांचे आई-वडील आणि चुलत भाऊ किशोर दादू वाघमारे यांच्यामध्ये गेल्या अनेक दिवसांपासून संपत्तीचा वाद सुरू आहे. हा वाद प्रामुख्याने अहिल्यानगर जिल्ह्यातील संगमनेर येथील शेतजमिनीशी संबंधित वाद न्यायालयात सुरू आहे. तसेच मुंबईतील वडाळा येथील घराशी संबंधितही हा वाद आहे. २१ जानेवारी २०२६ रोजी वांद्रे येथील एस.आर.ए. कार्यालयात झालेल्या सुनावणीत तक्रारदाराच्या आईने घराची सर्व अधिकृत कागदपत्रे सादर केली होती.
मात्र, किशोर वाघमारेकडे कोणतीही कायदेशीर कागदपत्रे नसल्याने त्याला तेथून बाहेर काढण्यात आले होते, याचा राग त्याने मनात धरला होता. २२ जानेवारी रोजी देखील किशोरने वृद्ध सुमन वाघमारे यांच्याशी हुज्जत घातली होती, याची नोंद वडाळा पोलीस ठाण्यात अदखलपात्र गुन्हा म्हणून करण्यात आली होती.
त्यानंतर शुक्रवारी (२३ जानेवारी) सकाळी १०:४५ च्या सुमारास पुन्हा या वादाचा भडका उडाला. किशोर वाघमारेची पत्नी माया, आणि त्याच्या तीन बहिणी संगीता दिलीप अभंग, वनिता कैलाश पवार व सुनिता रविंद्र पवार या सर्वजणी खळी, संगमनेरहून वडाळ्यात आल्या. या महिलांनी प्रथम तक्रारदार ज्योत्सना जाधव यांच्या घराच्या वरच्या मजल्यावर लोखंडी शिडीने चढण्याचा प्रयत्न केला व शिवीगाळ सुरू केली. घाबरलेल्या जाधव यांनी घराची लोखंडी जाळी बंद करून घेतली, त्यामुळे आरोपी महिलांचा मोर्चा शेजारीच राहणाऱ्या ७० वर्षीय सुमन रामदास वाघमारे यांच्या घराकडे वळाला.
आरोपी माया, संगीता, वनिता आणि सुनिता यांनी सुमन वाघमारे यांच्या घरात बळजबरीने प्रवेश केला आणि त्यांना ओढत घराबाहेर काढले. मायाने सुमन यांना घट्ट पकडून ठेवले, तर इतर तिघींनी त्यांना जमिनीवर पाडून लाथाबुक्क्यांनी अमानुष मारहाण केली. आपल्या आईचा जीव वाचवण्यासाठी धावून आलेल्या ज्योत्सना जाधव यांनाही या महिलांनी मारहाण करून दुखापत केली.
हल्ल्यानंतर सुमन वाघमारे यांची प्रकृती चिंताजनक झाल्याने त्यांना तातडीने सायन रुग्णालयात उपचारासाठी दाखल करण्यात आले आहे. वडाळा पोलिसांनी या घटनेची गंभीर दखल घेत आरोपी माया वाघमारे, संगीता अभंग, वनिता पवार आणि सुनिता पवार यांच्या विरोधात भारतीय न्याय संहिता (BNS), २०२३ च्या कलम ३(५), ३५२, ११५(२) आणि ३२९(४) अन्वये गुन्हा नोंदवला आहे. पोलीस निरीक्षक सुदर्शन होनवाडजकर यांच्या मार्गदर्शनाखाली पोलीस उपनिरीक्षक श्रीधर डोंगरे या प्रकरणाचा सखोल तपास करत आहेत.
