अपर पोलीस अधीक्षक सोमनाथ वाकचौरेंची मोठी मोहीम: पोलिसांचे ‘ऑपरेशन ऑल आऊट’; एकाच रात्रीत गुन्हेगारांचे धाबे दणाणले! शिवजयंतीच्या पार्श्वभूमीवर गुन्हेगारांवर धडक कारवाई

श्रीरामपूर, प्रतिनिधी – 

शिवजयंती आणि आगामी सण-उत्सवांच्या पार्श्वभूमीवर कायदा व सुव्यवस्था अबाधित राखण्यासाठी अपर पोलीस अधीक्षक सोमनाथ वाकचौरे यांच्या मार्गदर्शनाखाली श्रीरामपूर विभागातील १७ पोलीस स्टेशनच्या हद्दीत ‘ऑपरेशन ऑल आऊट’ राबविण्यात आले. १७ फेब्रुवारी २०२६ रोजी रात्री ११ ते पहाटे २ वाजेपर्यंत चाललेल्या या धडक मोहिमेमुळे संपूर्ण जिल्ह्यात गुन्हेगारांचे धाबे दणाणले आहेत. या कारवाईत वॉरंट बजावणी, अवैध धंदे, शस्त्रसाठा आणि अंमली पदार्थांच्या विरोधात मोठी कारवाई करण्यात आली आहे.

या मोहिमेत पोलिसांनी न्यायालयाचे आदेश पायदळी तुडवणाऱ्या आरोपींविरुद्ध विशेष मोहीम राबवली. यामध्ये ६१२ समन्स बजावण्यात आले असून, २१२ जणांविरुद्ध अजामीनपात्र वॉरंटची अंमलबजावणी करण्यात आली. विशेष म्हणजे, न्यायालयासमोर हजर न राहिलेल्या १०० आरोपींपैकी ३१ जणांना अटक करण्यात आली असून ६९ आरोपींना प्रत्यक्ष हजर करण्यात आले आहे.

अवैध व्यवसायांविरुद्धच्या कारवाईत दारूबंदी कायद्यांतर्गत ४२ गुन्हे दाखल करून ८० हजार ५०० रुपयांचा मुद्देमाल जप्त करण्यात आला. तसेच जुगार कायद्यान्वये १८ गुन्हे नोंदवून १ लाख ५४ हजार ४४० रुपयांची रोकड व साहित्य जप्त करण्यात आले. हत्यारबंदी कायद्याचे उल्लंघन करणाऱ्यांवरही कडक कारवाई करण्यात आली. 

श्रीरामपूर शहर आणि कोपरगाव परिसरात तलवार बाळगणाऱ्या शाहरुख शेख, इरफान सय्यद, अर्जुन सोनवणे आणि विशाल जगधने या चार जणांना अटक करून त्यांच्याकडून लोखंडी तलवारी जप्त करण्यात आल्या आहेत.

अंमली पदार्थांच्या तस्करीला आळा घालण्यासाठी संगमनेर शहर पोलिसांनी मुन्ना अब्बास शेख आणि संजय ऊर्फ संदीप मालुंजकर यांच्याकडून २४ हजार ९२५ रुपयांचा गांजा जप्त केला असून त्यांच्यावर एनडीपीएस कायद्यांतर्गत गुन्हा दाखल केला आहे. याशिवाय, पोलिसांच्या रेकॉर्डवरील ९ फरार आरोपींना पकडण्यात यश आले असून १९ हिस्ट्रीशीटर आणि १६ तडीपार आरोपींच्या हालचालींवर बारकाईने लक्ष ठेवण्यात आले आहे.

रस्ते सुरक्षेच्या दृष्टीने मोटार वाहन कायद्यांतर्गत ६७ केसेस करून ४९ हजार रुपयांचा दंड वसूल करण्यात आला. नेवासा पोलीस स्टेशनच्या हद्दीत चोरीच्या उद्देशाने वावरणाऱ्या दोन संशयितांना ताब्यात घेण्यात आले, तर शिर्डीत तडीपार आदेशाचे उल्लंघन करणाऱ्या एकाला अटक करण्यात आली. संगमनेरमध्ये गोवंश हत्येच्या उद्देशाने बांधून ठेवलेल्या ३० हजार रुपये किमतीच्या गायीची सुटका करून अज्ञात आरोपींविरुद्ध प्राणी संरक्षण कायद्यानुसार गुन्हा नोंदवण्यात आला आहे.

ही कारवाई जिल्हा पोलीस अधीक्षक सोमनाथ घार्गे आणि अपर पोलीस अधीक्षक सोमनाथ वाकचौरे यांच्या मार्गदर्शनाखाली उपविभागीय पोलीस अधिकारी जयदत्त भवर (श्रीरामपूर), कुणाल सोनवणे (संगमनेर), अमोल भारती (शिर्डी), निरज राजगुरू (शेवगाव) आणि त्यांच्या पथकाने यशस्वीरीत्या पार पाडली.