स्थानिक गुन्हे शाखेची मोठी कारवाई; ४०० किलो प्रतिबंधित मांगुर माशासह २९ लाखांचा मुद्देमाल पकडला, चार परप्रांतीयांना बेड्या

संगमनेर, प्रतिनिधी
राज्यात प्रतिबंधित असलेल्या मांगुर माशांच्या बेकायदेशीर वाहतुकीविरोधात स्थानिक गुन्हे शाखेने शिर्डी पोलीस ठाण्याच्या हद्दीत मोठी कारवाई केली आहे. या कारवाईत पोलिसांनी ४०० किलो मांगुर मासे आणि एक ट्रक असा एकूण २१ लाख रुपयांचा मुद्देमाल जप्त केला असून चार आरोपींना ताब्यात घेतले आहे.
अहिल्यानगरचे पोलीस अधीक्षक सोमनाथ घार्गे यांनी जिल्ह्यातील अवैध व्यवसायांवर कारवाई करण्याचे आदेश दिले होते. त्यानुसार स्थानिक गुन्हे शाखेचे पोलीस निरीक्षक किरणकुमार कबाडी यांच्या मार्गदर्शनाखाली सहाय्यक पोलीस निरीक्षक दीपक मेवे, पोलीस अंमलदार राहुल द्वारके, शाहिदा शेख, फुरकान शेख, राहुल डोके, सुनील माळवदकर, प्रशांत राठोड, सतीश भवर आणि चालक उमाकांत गावडे यांच्या पथकाने ही कारवाई केली.
पोलीस अधिकाऱ्यांनी दिलेल्या माहितीनुसार, मनमाड हायवे रोडवरील निमगाव बायपासवरून एका ट्रकमध्ये (क्रमांक WB25M5023) केंद्र सरकारने प्रतिबंधित केलेले मांगुर मासे नेले जात असल्याची खात्रीशीर माहिती पथकाला मिळाली. स्थानिक गुन्हे शाखेने तातडीने शिर्डी पोलीस स्टेशनचे पोलीस निरीक्षक रणजित गलांडे, सागर काळे व त्यांच्या पथकाला सोबत घेऊन निमगाव बायपास रोडवर सापळा रचला. संशयित ट्रक अडवून त्याची झडती घेतली असता, त्यामध्ये प्रतिबंधित मांगुर मासे आढळून आले.
या प्रकरणी पोलिसांनी चार जणांना ताब्यात घेतले असून त्यांची नावे स्वप्न नियम डे (वय ३६ वर्षे, रा. वामनगंज, जि. बाराशाद, पश्चिम बंगाल), मकबुल रौफ सरदार (वय ३१ वर्षे, रा. मसलंदापूर, जि. नॉर्थ २४ परगणा, पश्चिम बंगाल), कुतुब आयुब मंडल (वय ३५ वर्षे, रा. बदुडीया, जि. नॉर्थ २४ परगणा, पश्चिम बंगाल) आणि मृत्युंजय मुकुल विश्वास (वय २७ वर्षे, रा. हाबरा, जि. नॉर्थ २४ परगणा, पश्चिम बंगाल) अशी आहेत. चौकशीदरम्यान आरोपींनी हे मासे पश्चिम बंगालमधून आणले असून ते मिराज यांच्याकडून घेऊन खोपोली येथील भाई नावाच्या व्यक्तीला देण्यासाठी जात असल्याचे सांगितले.
मत्स्य विकास अधिकारी प्रतिक्षा सुधाकर पाटेकर यांनी घटनास्थळी येत या माशांची पाहणी केली आणि ते प्रतिबंधित मांगुर मासे असल्याचा अभिप्राय दिला. पोलिसांनी ४ लाख रुपये किमतीचे ४०० किलो मासे आणि १७ लाख रुपयांचा ट्रक असा एकूण २१ लाख रुपयांचा मुद्देमाल जप्त केला आहे. जप्त केलेले मासे कायदेशीर प्रक्रिया पूर्ण करून नष्ट करण्यात आले आहेत.
या प्रकरणी मत्स्य विकास अधिकारी प्रतिक्षा पाटेकर यांच्या फिर्यादीवरून शिर्डी पोलीस ठाण्यात भारतीय न्याय संहिता २०२३ चे कलम २२३, २७५, ३(५) प्रमाणे गुन्हा दाखल करण्यात आला आहे.