महाराष्ट्र संवाद न्यूज ऑनलाईन | आळेफाटा
शिखर शिंगणापूरहून पायी दिंडी घेऊन धांदरफळ (ता. संगमनेर) येथे परतत असताना वाटेत नियोजनावरून वाद झाल्याने एका तरुणाला लाथाबुक्क्यांनी, वायरने आणि लाकडी काठीने अमानुष मारहाण केल्याची धक्कादायक घटना समोर आली आहे. या प्रकरणी आळेफाटा पोलीस ठाण्यात ११ आरोपींविरुद्ध गुन्हा दाखल करण्यात आला आहे. मनोज सुरेश खुरपे (वय ३४) असे फिर्यादीचे नाव असून ते धांदरफळ येथील रहिवासी आहेत.
मिळालेल्या माहितीनुसार, मनोज खुरपे व त्यांच्या गावातील अंदाजे ७० लोक दिंडीनिमित्त शिखर शिंगणापूरला गेले होते. ३० मार्च रोजी ते सर्वजण पायी गावाकडे निघाले होते. ४ एप्रिल रोजी दुपारी एकच्या सुमारास हे लोक आळे रोडने जात असताना चार मोटारसायकलवरून आलेल्या १० ते १२ जणांनी त्यांना अडवले.
यावेळी प्रशांत बाळासाहेब कोल्हे, ओमकार अण्णासाहेब तोरकडी, संतोष सुनील शिंदे, प्रविण कारभारी शिंदे, विशाल अशोक कोल्हे, कौस्तुभ संजय बिडवे आणि एक अनोळखी इसम यांनी फिर्यादीला ‘तू तुझ्या मनानेच नियोजन का करतोस, तुला कोणी अधिकार दिला?’ असे म्हणत शिवीगाळ केली.
यावेळी प्रशांत कोल्हे याने त्याच्याजवळील वायरने आणि ओमकार तोरकडी याने लाकडी काठीने मनोज खुरपे यांना डोक्यात, पाठीवर, पोटावर आणि हातापायावर मारहाण करण्यास सुरुवात केली. त्याच वेळी संतोष शिंदे, प्रविण कारभारी शिंदे, विशाल अशोक कोल्हे, कौस्तुभ बिडवे आणि एक अनोळखी इसम यांनी फिर्यादी आणि त्यांच्यासोबत असलेल्या विशाल मुरलीधर काळे व सुनील हासे यांना हाताने व लाथाबुक्क्यांनी मारहाण करून तेथून निघून गेले.
मारहाण करून पुढे गेल्यानंतर आरोपी आळेगावातील महादेव मंदिरासमोर थांबले होते. तिथे पुन्हा प्रशांत कोल्हे, ओमकार तोरकडी, संतोष शिंदे, प्रविण कारभारी शिंदे, विशाल कोल्हे, कौस्तुभ बिडवे, एक अनोळखी इसम तसेच दिंडीतील आशिष मच्छिंद्र कोल्हे, निखिल संजय जाधव, विकास गोरख कोल्हे आणि कार्तिक कैलास कोल्हे हे सर्वजण उपस्थित होते. यावेळी निखिल जाधव आणि आशिष कोल्हे यांनी फिर्यादीला ‘तुला जास्त माज आला आहे का, तू आमच्या नादी लागू नको, नाहीतर तुला संपवून टाकू’ अशी जिवे मारण्याची धमकी दिली. या मारहाणीत फिर्यादीच्या गळ्यातील एक तोळा वजनाची सोन्याची चैन गहाळ झाली. त्यानंतर घाबरलेले फिर्यादी आळेगावातील अंबिका माता मंदिराजवळ आले असता, तेथेही आरोपींनी त्यांना पुन्हा धमकी दिली.
या सर्व प्रकारानंतर फिर्यादीने इतर साथीदारांना बोलावून पोलीस ठाण्यात धाव घेतली. त्यांनी दिलेल्या फिर्यादीवरून आळेफाटा पोलीस ठाण्यात भारतीय न्याय संहिता (बी एन एस) कलम ११८(१), ११५(२), ३५२, ३५१(२)(३), १८९(२) आणि १९१(२) अन्वये गुन्हा दाखल करण्यात आला आहे. या घटनेचा पुढील तपास आळेफाटा पोलीस करत आहेत.
