नोकरीचे आमिष दाखवून तरुणीवर अत्याचार; अहिल्यानगरच्या माजी महापौरांवर दुसरा गुन्हा दाखल

महाराष्ट्र संवाद न्यूज ऑनलाईन, अहिल्यानगर
नोकरी मिळवून देण्याचे आमिष दाखवून एका २७ वर्षीय तरुणीवर अत्याचार केल्याची धक्कादायक घटना उघडकीस आली असून, याप्रकरणी माजी महापौर अभिषेक कळमकर विरुद्ध भिंगार कॅम्प पोलीस ठाण्यात गुन्हा दाखल करण्यात आला आहे. कळमकर विरुद्धचा हा दुसरा गुन्हा असल्याने खळबळ उडाली आहे.
मिळालेल्या माहितीनुसार, मे २०२४ मध्ये लोकसभा निवडणुकीच्या प्रचारादरम्यान पीडित तरुणीची ओळख आरोपीशी झाली होती. पीडितेने ती बेरोजगार असल्याचे सांगितल्यानंतर कळमकरने तिला नोकरीचे आश्वासन दिले. त्यानंतर जुलै २०२४ मध्ये त्याने पीडितेशी पुन्हा संपर्क साधून तिला नगर क्लबजवळील एका निर्जन ठिकाणी बोलावले. तिथे कारमध्ये तिला पिण्याच्या पाण्यातून गुंगीचे औषध देऊन तिच्यावर अत्याचार केला.
त्यानंतर काही दिवसांनी आरोपीने शोरूममध्ये काम देण्याच्या बहाण्याने तिला पुन्हा पाथर्डी रस्त्यावरील बेलेश्वर मंदिर परिसरात बोलावले. तिने नकार दिल्यावर आरोपीने स्वतःच्या कारमधील घटनेचे फोटो आणि व्हिडिओ सोशल मीडियावर व्हायरल करण्याची तसेच जीवे मारण्याची धमकी दिली होती, यामुळे पीडिता घाबरली होती. मात्र, आरोपीविरुद्ध अन्य गुन्हे दाखल झाल्याचे समजताच तिने धीर धरून पोलिसांत तक्रार दिली.
यापूर्वी २१ फेब्रुवारी रोजी शिरूर येथील एका तरुणीच्या तक्रारीवरून कळमकरविरुद्ध एमआयडीसी पोलीस ठाण्यात अत्याचाराचा गुन्हा दाखल झाला असून, तो गेल्या दीड महिन्यांपासून फरार आहे. जिल्हा न्यायालयाने त्याचा अटकपूर्व जामीन अर्ज फेटाळून त्याच्याविरुद्ध स्टँडिंग वॉरंट जारी केल्यामुळे आरोपीच्या अडचणीत मोठी वाढ झाली आहे.