अहिल्यानगर:
नेवासा नगरपंचायतीचे मुख्याधिकारी निखिल फराटे यांच्यावर गोळीबार करून त्यांच्या हत्येचा प्रयत्न केल्याची धक्कादायक घटना समोर आली आहे. याप्रकरणी नेवासा नगरपंचायतीच्या उपनगराध्यक्षांचे पती संजय लक्ष्मण सुखदान यांच्याविरुद्ध पोलीस ठाण्यात गुन्हा दाखल करण्यात आला आहे.
१३ एप्रिल रोजी घडलेल्या या घटनेनंतर मुख्याधिकारी प्रचंड दहशतीखाली असल्याने त्यांनी शनिवारी उशिरा फिर्याद दिली, त्यानंतर पोलिसांनी वेगाने हालचाली सुरू केल्या आहेत.
मुख्याधिकारी फराटे यांनी दिलेल्या फिर्यादीनुसार, संजय सुखदान यांनी यापूर्वीही अनेकदा नियमबाह्य कामांसाठी त्यांच्यावर दबाव आणला होता. मागणी पूर्ण न केल्याने त्यांनी मुख्याधिकाऱ्यांना चप्पल उगारून मारहाणीचा प्रयत्न केला होता आणि गंभीर परिणाम भोगण्याची धमकीही दिली होती.
१३ एप्रिल रोजी सायंकाळी नगरपंचायत कार्यालयात सुरू असलेल्या वादाचे पर्यावसान पुढे गोळीबारात झाले. फराटे हे कार्यालयीन काम संपवून अहिल्यानगरच्या दिशेने जात असताना सुखदान यांनी त्यांच्या बुलेटने मुख्याधिकाऱ्यांच्या चारचाकीला धडक दिली. त्यानंतर खोलेश्वर मंदिर चौकात गाडी अडवून सुखदान यांनी गावठी कट्ट्यातून थेट निखिल फराटे यांच्या दिशेने गोळी झाडली. फराटे प्रसंगावधान राखून खाली वाकल्याने त्यांचा जीव वाचला, तर दुसरी गोळी झाडताना कट्ट्याचा ट्रिगर अडकल्याने मोठा अनर्थ टळला.
सुरुवातीला प्रचंड घाबरलेल्या मुख्याधिकाऱ्यांनी तक्रार करण्यास विलंब केला, मात्र आरोपीचे काही साथीदार सातत्याने पाठलाग करत असल्याचे लक्षात आल्यानंतर त्यांनी तोफखाना पोलीस ठाण्यात धाव घेऊन तक्रार नोंदवली. तोफखाना पोलिसांनी गुन्हा दाखल करून पुढील तपासासाठी तो नेवासा पोलिसांकडे वर्ग केला आहे.
या प्रकरणातील मुख्य आरोपी संजय सुखदान सध्या फरार असून, पोलीस निरीक्षक महेश पाटील यांच्या मार्गदर्शनाखाली पोलीस पथके त्याचा शोध घेत आहेत. या घटनेमुळे शासकीय वर्तुळात आणि नेवासा शहरात मोठी खळबळ माजली आहे.
