तमाशा महर्षी रघुवीर खेडकर यांना ‘पद्मश्री’; संगमनेरकरांसाठी गौरवाचा क्षण – आमदार खताळ

महाराष्ट्र संवाद न्यूज ऑनलाईन, संगमनेर:

तमाशा क्षेत्रातील ज्येष्ठ लोककलावंत रघुवीर खेडकर यांना राष्ट्रपती द्रौपदी मुर्मू यांच्या हस्ते दिल्लीतील राष्ट्रपती भवनात ‘पद्मश्री’ पुरस्काराने सन्मानित करण्यात आले. हा सन्मान संपूर्ण संगमनेर तालुक्यासाठी आणि महाराष्ट्रातील तमाशा रसिकांसाठी अत्यंत अभिमानास्पद असल्याची भावना आमदार अमोल खताळ यांनी व्यक्त केली.

महाराष्ट्र राज्य तमाशा फड मालक संघटनेचे अध्यक्ष आणि संगमनेरचे सुपुत्र असलेल्या रघुवीर खेडकर यांनी आपल्या असामान्य कलागुणांच्या जोरावर पारंपरिक लोककलेचा झेंडा राष्ट्रीय स्तरावर फडकवला. अनेक वर्षांच्या संघर्षानंतरही त्यांच्या कार्याची योग्य दखल घेतली जात नसल्याची त्यांची भावना होती. मात्र, संगमनेरमधील राजकीय परिवर्तनानंतर आमदार अमोल खताळ यांनी शासन स्तरावर यासाठी विशेष पाठपुरावा केला.

कांताबाई सातारकर पुरस्कार सोहळ्यादरम्यान संगमनेर येथे आलेले सांस्कृतिक मंत्री उदय सामंत यांच्याकडे आमदार खताळ यांनी खेडकर यांच्या नावाची शिफारस करण्याची आग्रही मागणी केली होती. या मागणीची दखल घेत सांस्कृतिक विभागाने केंद्र सरकारकडे प्रस्ताव पाठवला, याला अखेर यश आले.

रघुवीर खेडकर यांनी आयुष्यभर लोकपरंपरा आणि महाराष्ट्राची ओळख देशभर पोहोचवण्याचे मोठे कार्य केले असून, या पुरस्कारामुळे संपूर्ण तमाशा कलेची मान उंचावली असल्याचे आमदार खताळ यांनी म्हटले आहे.