आधीच मुसळधार, त्यात दूषित पाण्याचा धोका! संगमनेर पालिकेच्या ढिसाळ कारभारावर विरोधी नगरसेविका साक्षी सूर्यवंशी कडाडल्या… मुख्याधिकाऱ्यांकडे केल्या ‘या’ मागण्या

महाराष्ट्र संवाद न्यूज ऑनलाईन
संगमनेर:
संगमनेर शहरात मुसळधार पावसामुळे ठिकठिकाणी सांडपाणी साचले असून, पिण्याच्या पाण्याच्या जलवाहिन्यांमध्ये हे दूषित पाणी मिसळून नागरिकांचे आरोग्य धोक्यात येण्याची तीव्र शक्यता निर्माण झाली आहे. प्रशासनाने तात्काळ नियमित पाणी तपासणी करून शुद्ध पाणीपुरवठा करावा, अन्यथा संगमनेरकरांच्या आरोग्याशी होणारा खेळ खपवून घेतला जाणार नाही, असा थेट आणि आक्रमक इशारा शिवसेनेच्या (शिंदे गट) एकमेव विरोधी नगरसेविका साक्षी विनोद सूर्यवंशी यांनी नगरपालिका प्रशासनाला दिला आहे.
शहरातील गंभीर परिस्थितीच्या पार्श्वभूमीवर त्यांनी मुख्याधिकारी दयानंद गोरे यांना यासंबंधीचे निवेदन देत तातडीने युद्धपातळीवर उपाययोजना करण्याची मागणी केली आहे. सूर्यवंशी यांच्या या आक्रमक पवित्र्यानंतर आता संगमनेर नगरपालिका प्रशासन खडबडून जागे होणार का, याकडे संपूर्ण शहराचे लक्ष लागले आहे.
गेल्या काही दिवसांपासून सुरू असलेल्या सततच्या मुसळधार पावसामुळे संगमनेर शहरातील नाले आणि गटारी तुंबल्या असून अनेक भागांना डबक्याचे स्वरूप आले आहे. या साचलेल्या पाण्यामुळे जलवाहिन्या दूषित होण्याचा धोका तर आहेच, शिवाय रस्त्यांवर खड्डे पडून चिखलाचे साम्राज्य निर्माण झाले आहे. सूर्यवंशी यांनी प्रशासकीय ढिसाळपणावर प्रहार करत, शहरातील सर्व नाले आणि गटारींची २४ तासांत साफसफाई करण्याची आणि पाणी साचणाऱ्या भागात तात्काळ पाण्याचा निचरा करणारी यंत्रणा कार्यान्वित करण्याची मागणी केली आहे. तसेच, पावसामुळे चिखलमय झालेल्या रस्त्यांवर तातडीने मुरूम टाकून तात्पुरती दुरुस्ती करावी, अशीही आग्रही मागणी त्यांनी केली आहे.
नागरिकांच्या सुरक्षेचा प्रश्न केवळ रस्त्यापुरता मर्यादित नसून वीज पुरवठ्याबाबतही प्रशासनाने गांभीर्य दाखवावे, असे सूर्यवंशी यांनी निवेदनात म्हटले आहे. शहरातील बंद असलेले पथदिवे तात्काळ सुरू करण्यात यावेत आणि महावितरण विभागाशी तातडीने समन्वय साधून धोकादायक अवस्थेतील वीज खांब, लोंबकळणाऱ्या विद्युत तारा व स्ट्रीट लाईटची तपासणी करून संभाव्य दुर्घटना टाळाव्यात, असे त्यांनी खडसावून सांगितले आहे.
नदी परिसरात निर्माण झालेल्या पूरजन्य परिस्थितीचा दाखला देत त्यांनी आपत्ती व्यवस्थापन यंत्रणेच्या सुस्थितीवर प्रश्नचिन्ह उपस्थित केले आहे. नदीकाठच्या भागात आपत्ती व्यवस्थापन पथक, अग्निशमन दल आणि नगरपालिका कर्मचाऱ्यांना २४ तास हायअलर्टवर ठेवण्यात यावे, तसेच नदी, पूल व बंधाऱ्यांवर धोक्याचे सूचना फलक लावून प्रशासनाने आपली जबाबदारी चोख पार पाडावी, अशी मागणी त्यांनी केली आहे. आपत्कालीन परिस्थिती उद्भवल्यास नागरिकांच्या तक्रारींचे तात्काळ निवारण करण्यासाठी पालिकेने तात्काळ स्वतंत्र नियंत्रण कक्ष (कंट्रोल रूम) सुरू करावा, असेही त्यांनी निवेदनात स्पष्ट केले आहे.
दरम्यान सूर्यवंशी यांनी प्रशासनाला धारेवर धरण्यासोबतच संभाव्य धोके लक्षात घेत संगमनेरच्या जनतेलाही स्वतःच्या सुरक्षेसाठी सतर्क राहण्याचे जाहीर आवाहन केले आहे. नदी व ओढ्यांचा प्रवाह वाढलेला असल्याने नागरिकांनी कोणत्याही परिस्थितीत पात्रात उतरू नये, तसेच पूरस्थिती पाहण्यासाठी अथवा ‘सेल्फी’ आणि छायाचित्रे काढण्यासाठी नदी परिसरात गर्दी करून स्वतःचा जीव धोक्यात घालू नये, असे त्यांनी बजावले आहे. पाण्याखाली गेलेले रस्ते, पूल किंवा बंधाऱ्यांवरून वाहने नेण्याचा किंवा चालत जाण्याचा धाडसी प्रयत्न करू नये आणि लहान मुलांना नदी परिसरात एकटे सोडू नये, असे सांगतानाच त्यांनी वीज खांब, तुटलेल्या विद्युत तारा किंवा पाण्यात बुडालेल्या उपकरणांपासून सुरक्षित अंतर राखण्याचे आवाहन केले आहे. तसेच दूषित पाण्यामुळे होणारे साथीचे आजार टाळण्यासाठी नागरिकांनी पाणी स्वच्छ आणि उकळूनच वापरावे, असे सांगत प्रशासकीय सूचनांचे काटेकोर पालन करण्याचे आवाहन त्यांनी केले आहे.