संगमनेरला स्वतंत्र आरटीओ कार्यालय मिळणार; आमदार सत्यजीत तांबे यांच्या पाठपुराव्याला परिवहन मंत्र्यांचा सकारात्मक प्रतिसाद

संगमनेर:
आमदार सत्यजीत तांबे यांच्या सातत्यपूर्ण पाठपुराव्याला मोठे यश येण्याची चिन्हे असून संगमनेर येथे स्वतंत्र उपप्रादेशिक परिवहन कार्यालय स्थापन करण्याबाबत परिवहन मंत्री प्रतापराव सरनाईक यांनी सकारात्मक प्रतिसाद दिला आहे.
मुंबईत पार पडलेल्या एका महत्त्वपूर्ण बैठकीत आमदार तांबे यांनी परिवहन मंत्र्यांची भेट घेऊन संगमनेर आणि अकोले परिसरासाठी नव्या निकषांनुसार स्वतंत्र आरटीओ कार्यालय मंजूर करण्याची मागणी केली. यावर तातडीने कार्यवाही करत परिवहन मंत्र्यांनी नव्या शासन अध्यादेशातील निकषांच्या आधारे संगमनेरसाठीचा प्रस्ताव सकारात्मकरीत्या तयार करून शासनाकडे सादर करण्याचे निर्देश संबंधित अधिकाऱ्यांना दिले आहेत.
संगमनेर हे अहिल्यानगर जिल्ह्यातील एक मुख्य व्यापारी, शैक्षणिक आणि वाहतूक केंद्र असल्याने येथे दरवर्षी मोठ्या प्रमाणावर वाहनांची खरेदी-विक्री होते. मात्र, सध्या वाहन नोंदणी, परवाने आणि इतर परिवहन सेवांसाठी स्थानिक नागरिकांना दूरवरच्या आरटीओ कार्यालयांवर अवलंबून राहावे लागते. यामुळे सर्वसामान्यांचा वेळ, पैसा आणि श्रम यांचा मोठा अपव्यय होत असल्याने येथे स्वतंत्र कार्यालयाची अत्यंत गरज आहे.
या लोकोपयोगी प्रश्नावर आमदार सत्यजीत तांबे गेल्या अनेक वर्षांपासून विविध स्तरांवर सातत्याने पाठपुरावा करत आहेत. २४ मार्च २०२५ रोजी तत्कालीन मुख्यमंत्र्यांकडे केलेल्या मागणीनंतर तांत्रिक कारणांमुळे स्वतंत्र आरटीओ ऐवजी कॅम्प ऑफिस मंजूर झाले होते, मात्र ते अद्याप सुरू न झाल्याने ते तातडीने कार्यान्वित करून पुढे त्याचे रूपांतर स्वतंत्र आरटीओ मध्ये करावे, अशी मागणी त्यांनी केली आहे. यापूर्वी जुलै २०२५ च्या पावसाळी अधिवेशनातही त्यांनी विधान परिषदेत हा प्रश्न अत्यंत प्रभावीपणे मांडला होता. संगमनेर आणि परिसरातील लाखो नागरिकांना त्यांच्या हक्काची आणि सुलभ परिवहन सेवा मिळेपर्यंत हा पाठपुरावा सुरूच ठेवण्याचा निर्धार आमदार तांबे यांनी व्यक्त केला आहे.
या मागणीचा सातत्यपूर्ण पाठपुरावा-
📌 २४ मार्च २०२५ : तत्कालीन मुख्यमंत्री एकनाथ शिंदे यांच्याकडे संगमनेरसाठी स्वतंत्र RTO कार्यालयाची मागणी करण्यात आली. त्यावेळी काही तांत्रिक कारणांमुळे स्वतंत्र RTO ऐवजी स्वतंत्र कॅम्प ऑफिस मंजूर करण्यात आले. मात्र, ते अद्याप कार्यान्वित झाले नसल्याने कॅम्प ऑफिस तातडीने सुरू करावे आणि पुढे संगमनेर–अकोलेसाठी स्वतंत्र RTO मंजूर करावे, अशी मागणी करण्यात आली.
📌 जुलै २०२५ (पावसाळी अधिवेशन) : विधान परिषदेत संगमनेर, अकोले व परिसरातील नागरिकांच्या सोयीसाठी स्वतंत्र उपप्रादेशिक परिवहन कार्यालय (RTO) स्थापन करण्याचा प्रश्न पुन्हा प्रभावीपणे उपस्थित करून शासनाचे लक्ष वेधण्यात आले.