वडझरी बुद्रुक येथे खाण व क्रेशरविरोधात ग्रामस्थांचे आमरण उपोषण; ‘आता आरपारची लढाई’ म्हणत तीव्र एल्गार

महाराष्ट्र संवाद न्यूज ऑनलाईन, संगमनेर
संगमनेर तालुक्यातील वडझरी बुद्रुक परिसरात सुरू असलेल्या बेकायदेशीर खाणकाम, तीव्र ब्लास्टिंग आणि स्टोन क्रेशरच्या त्रासाला कंटाळून अखेर स्थानिक शेतकरी व ग्रामस्थांनी आमरण उपोषणाचे हत्यार उपसले आहे. याबाबत वारंवार तक्रारी करूनही प्रशासनाकडून कोणतीही ठोस कारवाई होत नसल्याने संतप्त झालेल्या नागरिकांनी आजपासून (१ जून) उपोषण आंदोलनाला सुरुवात केली आहे.
गावालगत अव्याहतपणे सुरू असलेल्या या खाणकामामुळे परिसरातील शेतीचे मोठे नुकसान झाले आहे. सतत होणाऱ्या जोरदार ब्लास्टिंगमुळे परिसरातील घरांना तडे गेले असून, नागरिकांच्या पिण्याच्या पाण्याचे मुख्य स्रोत असलेल्या विहिरी आणि बोअरवेलच्या पाणी पातळीवरही याचा विपरीत परिणाम झाला आहे.
याशिवाय, क्रेशरमधून उडणाऱ्या धूळ प्रदूषणामुळे स्थानिक नागरिकांच्या, विशेषतः लहान मुले आणि वृद्धांच्या आरोग्याचा प्रश्न अत्यंत गंभीर बनला आहे. महसूल विभाग आणि संबंधित यंत्रणांनी यापूर्वी केवळ चौकशीचे आदेश देऊन वेळ मारून नेल्याचा आरोप करत, आता मागण्या मान्य झाल्याशिवाय मागे हटणार नाही, अशी ठाम भूमिका उपोषणकर्त्यांनी घेतली आहे.
या आंदोलनाच्या माध्यमातून ग्रामस्थांनी बेकायदेशीर खाणकाम व स्टोन क्रेशर तात्काळ पूर्णपणे बंद करण्याची प्रमुख मागणी केली आहे. तसेच, आजवर झालेल्या ब्लास्टिंगमुळे घरांच्या व शेतीच्या झालेल्या नुकसानीचे शासकीय पंचनामे करून योग्य ती नुकसानभरपाई मिळावी, प्रदूषणाचे नियम धाब्यावर बसवणाऱ्यांवर कठोर कायदेशीर कारवाई व्हावी आणि या संपूर्ण प्रकरणाची उच्चस्तरीय चौकशी करण्यात यावी, अशी मागणीही लावून धरण्यात आली आहे.
सध्या उपोषणस्थळी गावातील शेतकरी, युवक, महिला आणि विविध सामाजिक संघटनांचे प्रतिनिधी मोठ्या संख्येने उपस्थित राहत असून, या आंदोलनाला लोकपाठिंबा सातत्याने वाढत आहे. वारंवार निवेदने देऊनही आणि प्रशासकीय चौकशीचे आदेश निघूनही प्रत्यक्षात कारवाई का होत नाही, तसेच या खाण व क्रेशर चालकांना नेमके कोणाचे राजकीय किंवा प्रशासकीय अभय लाभले आहे, असा संतप्त सवाल आता वडझरीचे ग्रामस्थ उघडपणे विचारू लागले आहेत.