संगमनेरमधील अवैध कत्तलखान्यांवर नगर परिषद व पोलिसांचा मोठा हातोडा; सात कत्तलखाने केले जमीनदोस्त

महाराष्ट्र संवाद न्यूज ऑनलाईन, संगमनेर:

शहरातील अवैध व्यवसायांवर आणि अतिक्रमणांवर प्रशासनाने मंगळवारी मोठी कारवाई केली आहे. संगमनेर नगर परिषद आणि शहर पोलीस स्टेशन यांच्या संयुक्त विद्यमाने शहरातील विविध भागांत सुरू असलेल्या तब्बल सात अवैध कत्तलखान्यांवर बुलडोझर फिरवून ते पूर्णपणे जमीनदोस्त करण्यात आले आहेत. या धडक मोहिमेमुळे अवैध कत्तलखाना चालकांचे धाबे दणाणले आहे.

मुख्याधिकारी दयानंद गोरे यांनी दिलेल्या माहितीनुसार, संगमनेर शहरातील जमजम कॉलनी, कादरी नगर आणि त्याच्या आसपासच्या परिसरात मोठ्या प्रमाणावर अवैध कत्तलखाने सुरू असल्याची माहिती प्रशासनाला मिळाली होती. या माहितीच्या आधारे नगर परिषदेचे मुख्याधिकारी दयानंद गोरे आणि संगमनेर शहर पोलीस स्टेशनचे पोलीस निरीक्षक समीर बारवकर यांच्या मार्गदर्शनाखाली एका विशेष मोहिमेचे नियोजन करण्यात आले.

ही कारवाई अत्यंत गोपनीय आणि नियोजनबद्ध पद्धतीने पार पाडण्यात आली. कत्तलखाने पाडण्यासाठी नगर परिषदेचे एक जेसीबी यंत्र, दोन ट्रॅक्टर आणि २० मजूर तैनात करण्यात आले होते. कोणताही अनुचित प्रकार घडू नये आणि कायदा व सुव्यवस्थेचा प्रश्न निर्माण होऊ नये, यासाठी संगमनेर शहर पोलीस स्टेशनचे पोलीस निरीक्षक समीर बारवकर यांच्या नेतृत्वाखाली पोलीस पथक आणि नगर परिषदेच्या सुरक्षा दलाने घटनास्थळी चोख पोलीस बंदोबस्त तैनात केला होता. कडक बंदोबस्तात जेसीबीच्या साहाय्याने सातही अवैध कत्तलखान्यांचे बांधकाम पूर्णपणे निष्कासित करण्यात आले.

या धडक मोहिमेत सुरक्षा दलासह नगर परिषदेचे प्रशासन अधिकारी प्रल्हाद देवरे, अतिक्रमण विभाग प्रमुख महेश गोरडे, अल्ताफ शेख, जयराम मंडलिक, भीमाशंकर वर्पे, राजेंद्र मस्के, किशोर बिडगर, प्रदीप मावलकर आणि वसंत मेहेर यांच्यासह नगर परिषदेच्या इतर कर्मचाऱ्यांनी प्रत्यक्ष सहभाग नोंदवून ही कारवाई यशस्वी केली.

शहरातील शांतता व सुव्यवस्था अबाधित राखण्यासाठी आणि अवैध कृत्यांना आळा घालण्यासाठी प्रशासनाची ही मोहीम यापुढेही अशीच सुरू राहील, असा इशारा नगर परिषद प्रशासनाच्या वतीने देण्यात आला आहे. या धाडसी कारवाईमुळे संगमनेर नागरिकांमधून समाधान व्यक्त होत आहे.