महाराष्ट्र संवाद न्यूज ऑनलाईन, अहिल्यानगर:
शहरातील तोफखाना पोलीस ठाण्याच्या हद्दीत अवैध रित्या चालणाऱ्या मटका अड्ड्यांवर पोलिसांनी एकाच दिवशी मोठी धडक कारवाई केली आहे. पोलीस अधीक्षक मुम्मका सुदर्शन यांच्या आदेशानुसार, एमआयडीसी पोलीस ठाण्याचे प्रभारी अधिकारी सहायक पोलीस निरीक्षक माणिक चौधरी यांच्या पथकाने १ जून रोजी ६ वेगवेगळ्या ठिकाणी छापे टाकले. या कारवाईत पोलिसांनी एकूण १० जणांना ताब्यात घेतले असून त्यांच्याकडून १ लाख ४५ हजार ६७० रुपयांचा मुद्देमाल जप्त करण्यात आला आहे.
या धडक कारवाईत बागडपट्टी रोडवरील सदगुरू ऑटो सर्व्हिसच्या पाठीमागे नरेश नागेश यनगुल (वय ४५) आणि दिनकर मच्छिंद्र दोंडकर (वय ४०) यांना पकडण्यात आले. तसेच नवरंग व्यायामशाळेजवळील सटवाई मंदिराच्या मागे प्रदीप शंकर चिल्का (वय ४३) याला, तर जगदंबा मोटार गॅरेजशेजारील एका पत्र्याच्या शेडमध्ये सतीश रामदास खेत्रे (वय ४२) आणि सतीश एकनाथ हिवाळे (वय ५१) यांना ताब्यात घेण्यात आले. याशिवाय मंगळगेट भागात घनश्याम मोहनलाल परदेशी (वय ४२), सर्जेपुरा चौकात बडे भोले फुटाणा दुकानाच्या पाठीमागे सचिन मधुकर राठोड (वय ४१) व आकाश राजेंद्र कांबळे (वय २८) आणि प्रियदर्शिनी कॉम्प्लेक्स इमारतीच्या बाजूला प्रशांत मोहन खैरे (वय ४३) व सुरज श्रीराम शेटे (वय ४०) यांना मटका खेळताना आणि खेळवताना रंगेहात पकडण्यात आले.
ताब्यात घेतलेल्या या सर्व आरोपींविरुद्ध तोफखाना पोलीस ठाण्यात महाराष्ट्र जुगार कायद्याच्या कलम १२ (अ) नुसार सहा स्वतंत्र गुन्हे दाखल करण्यात आले असून, त्यांना पुढील कारवाईसाठी तोफखाना पोलिसांच्या स्वाधीन करण्यात आले आहे. सदर कामगिरी पोलीस अधीक्षक मुम्मका सुदर्शन यांच्या मार्गदर्शनाखाली सपोनि माणिक चौधरी, सहायक फौजदार राकेश खेडकर, पोलीस हेड कॉन्स्टेबल राजू सुद्रीक, कॉन्स्टेबल किशोर जाधव, नवनाथ दहिफळे, सुरज देशमुख आणि उमेश शेरकर यांच्या पथकाने केली.
