शहरातील वाहतुकीला अडथळा ठरणाऱ्या भाजीपाला विक्रेत्यांच्या अतिक्रमणांवर पालिकेने धडक कारवाईचा बडगा उगारला आहे. मात्र, या अधिकृत कारवाईदरम्यान शासकीय कामात अडथळा आणून पालिका कर्मचाऱ्यांना दमदाटी व मारहाण केल्याप्रकरणी शहर पोलिसांनी दोन संशयितांवर गुन्हा दाखल केला आहे. या प्रकारामुळे परिसरात काही काळ प्रचंड तणावाचे वातावरण निर्माण झाले होते.
नेमकी घटना काय?
मिळालेल्या माहितीनुसार, पेटीट सर्कल परिसरातील भाजी व फळ विक्रेत्यांमुळे वाहतुकीची मोठी कोंडी होत होती. यावर तोडगा म्हणून नगरपालिकेने मेडिकव्हर हॉस्पिटलसमोरील जागेत शेड उभारून ३८ पदपथ विक्रेत्यांसाठी पर्यायी गाळ्यांची व्यवस्था केली होती. या गाळ्यांचे वाटप करण्यासाठी प्रशासनाकडून आधीच पूर्वसूचना व नोटिसा देण्यात आल्या होत्या.
मात्र, काही विक्रेत्यांनी नव्या जागेवर जाण्यास साफ नकार दिला आणि जुन्याच ठिकाणी व्यवसाय करण्याचा हट्ट धरला. त्यामुळे अखेर अतिक्रमण विभागाने पोलिसांच्या बंदोबस्तात थेट कारवाई सुरू केली.
रस्त्यावर ठिय्या आंदोलन अन् राडा
कारवाई सुरू होताच संतप्त झालेल्या काही विक्रेत्यांनी रस्त्यावर ठिय्या आंदोलन करत सुमारे अर्धा तास रस्ता रोखून धरला होता. यामुळे वाहतूक पूर्णपणे ठप्प झाली. यादरम्यान अतिक्रमण विभागाचे कर्मचारी महेश बोर्डे यांना दोन संशयितांनी दमदाटी करत मारहाण केली.
पोलिसांची मध्यस्थी
परिस्थिती हाताबाहेर जात असल्याचे पाहून पोलीस निरीक्षक समीर बारवकर यांच्या मार्गदर्शनाखाली पोलिसांचा ताफा तात्काळ घटनास्थळी दाखल झाला. पोलिसांनी मध्यस्थी करत आंदोलनकर्त्यांना ताब्यात घेतले आणि परिस्थिती नियंत्रणात आणली.
यांच्यावर गुन्हा दाखल
अतिक्रमण विभागाचे कर्मचारी महेश बोर्डे यांनी दिलेल्या तक्रारीवरून संशयित आरोपी शुभम ढोले व विलास पंधारे यांच्यावर शासकीय कामात अडथळा आणणे, दमदाटी व मारहाण केल्याप्रकरणी कलम १३२, ११९ (२), ३५२, २, ३ (५) नुसार शहर पोलीस ठाण्यात गुन्हा दाखल करण्यात आला आहे.
मुख्याधिकाऱ्यांचा इशारा
पर्यायी जागेला विनाकारण विरोध केल्यामुळेच ही कारवाई करावी लागली. संबंधित मार्गावर यापुढे कोणत्याही विक्रेत्याने रस्त्याच्या कडेला व्यवसाय करू नये, अन्यथा अधिक कडक कायदेशीर कारवाई करण्यात येईल.
