मालपाणी बजाज शोरूममधील मारहाण प्रकरण: आरोपींच्या अटकेसाठी संगमनेर प्रशासकीय भवनावर मोर्चा; तीव्र आंदोलनाचा इशारा
येत्या काळात तीव्र स्वरूपाचे उपोषण करण्याचा इशाराही ग्रामस्थांनी दिला आहे
मिळालेल्या माहितीनुसार, स्वप्नील सातपुते आणि त्यांचे सासरे त्र्यंबक लक्ष्मण राऊत हे आपले नादुरुस्त वाहन घेऊन मालपाणी बजाज शोरूममध्ये गेले होते. वाहनाची जबाबदारी स्वीकारून त्याची पावती देण्याबाबत चर्चा सुरू असताना, शोरूम व्यवस्थापक सचिन पलोड व इतर कर्मचाऱ्यांनी त्यांच्याशी अरेरावीची भाषा वापरत शिवीगाळ केली. एवढ्यावरूनच न थांबता त्यांनी फोन करून इतर लोकांना बोलावून घेतले आणि सातपुते व राऊत यांना बेदम मारहाण केल्याचा आरोप करण्यात आला आहे. याप्रकरणी संगमनेर शहर पोलिस ठाण्यात गुन्हा दाखल करण्यात आला आहे.
या मोर्चादरम्यान आंदोलकांच्या हातात आरोपींचे फोटो असलेले फलक होते, तसेच सर्वांनी हाताला काळ्या फिती बांधून शोरूम व्यवस्थापन आणि पोलिसांच्या संथ कारभाराचा निषेध केला. आरोपींना तात्काळ अटक करा आणि पीडितांना न्याय द्या अशा घोषणांनी संपूर्ण शासकीय भवन परिसर दणाणून गेला होता.
या आंदोलनात स्वप्नील सातपुते यांच्या कुटुंबीयांसह विविध सामाजिक संघटनांचे पदाधिकारी, महिला आणि तरुण मोठ्या संख्येने सहभागी झाले होते. आंदोलकांच्या तीव्र भावना लक्षात घेऊन शहर पोलिस निरीक्षक समीर बारवकर यांनी स्वतः आंदोलनस्थळी येऊन मागण्यांचे निवेदन स्वीकारले आणि या प्रकरणात योग्य ती कायदेशीर कारवाई करण्याचे आश्वासन दिले.
