घारगावमध्ये केमिकलयुक्त ताडीच्या अड्ड्यावर राज्य उत्पादन शुल्कचा छापा; २२० लिटर ताडी नष्ट!

महाराष्ट्र संवाद न्यूज ऑनलाईन
संगमनेर :
संगमनेर तालुक्यातील पठार भागातील घारगाव येथे गेल्या अनेक वर्षांपासून राजरोसपणे सुरू असलेल्या केमिकलयुक्त ताडी विक्रीच्या अड्ड्यावर राज्य उत्पादन शुल्क विभागाच्या संगमनेर पथकाने मंगळवारी सकाळी छापा टाकून कारवाई केली. पुणे-नाशिक राष्ट्रीय महामार्गालगत असलेल्या एका फिटनेस क्लबच्या पाठीमागील पत्र्याच्या शेडमध्ये हा काळा धंदा सुरू होता. या कारवाईत पथकाने तब्बल २२० लिटर केमिकलयुक्त ताडीचा मोठा साठा हस्तगत करून तो जागेवरच नष्ट केला आहे. या प्रकरणी सुनीता शेखय्या गुत्तेदार (वय ४४, रा. घारगाव) या महिला आरोपीविरुद्ध कारवाई करण्यात आली आहे.
राज्य उत्पादन शुल्क विभागाचे निरीक्षक योगेश सावखेडकर, उपनिरीक्षक गोकुळ नायकोडी, महिला जवान स्वाती फटांगरे, सरस्वती वराट, जवान दत्ता खाडे आणि विपुल कर्पे यांच्या पथकाने ही धडक कारवाई केली. विशेष म्हणजे, नोव्हेंबर २०२५ च्या ग्रामसभेत घारगावमधील अनधिकृत ताडी विक्री केंद्र, गावठी दारूचे अड्डे आणि इतर अवैध व्यवसाय बंद करण्याचा ठराव मंजूर करण्यात आला होता. त्यानंतर डिसेंबर २०२५ मध्येही उत्पादन शुल्क विभागाने याच अड्ड्यावर छापा टाकून मुद्देमाल नष्ट केला होता.
संशयित आरोपी सुनीता गुत्तेदार हिच्यावर मागील वर्षभरात चार गुन्हे दाखल असून, उपविभागीय दंडाधिकाऱ्यांकडे तिच्याकडून एक लाख रुपयांचे बंधपत्रही लिहून घेण्यात आले होते. मात्र, तरीही हा अवैध व्यवसाय पुन्हा सुरूच राहिल्याने ग्रामस्थांमधून तीव्र संताप व्यक्त होत आहे. वारंवार गुन्हे करणाऱ्या या आरोपीवर आता थेट ‘मकोका’ अंतर्गत कठोर कारवाई करावी, अशी मागणी घारगावमधील नागरिकांनी केली आहे.
दरम्यान, घारगाव पोलीस ठाण्याच्या हद्दीत पुणे-नाशिक राष्ट्रीय महामार्गालगत असलेल्या अनेक हॉटेल्समध्ये जेवणाच्या नावाखाली देशी-विदेशी दारूची बेकायदेशीर विक्री होत असल्याचे समोर आले आहे. तसेच परिसरातील किराणा दुकाने, हॉटेल्स आणि पानटपऱ्यांवर राज्यात प्रतिबंधित असलेला गुटखा व पानमसाला सर्रास विकला जात आहे, तर बोटा परिसरात मोठ्या प्रमाणावर अमली पदार्थ गांजाची विक्री सुरू आहे. या घातक अमली पदार्थांमुळे आणि अवैध व्यवसायांमुळे अनेक नागरिकांना दुर्धर आजार जडले असून अनेकांचे संसार उद्ध्वस्त झाले आहेत.
या पार्श्वभूमीवर, पोलीस आणि उत्पादन शुल्क विभागाने केवळ कागदोपत्री कारवाई न करता या सर्व मुख्य सूत्रधारांवर आणि अवैध धंद्यांवर कायमस्वरूपी कठोर कारवाई करावी, अशी मागणी पठार भागातील जनतेकडून केली जात आहे.