महाराष्ट्र संवाद न्यूज ऑनलाईन अहिल्यानगर: फेसबुकवरील आकर्षक जाहिरातीला भुलून जिओ कंपनीचा पेट्रोल पंप आणि त्याचा परवाना मिळवण्याच्या नादात अहिल्यानगरमधील एका व्यावसायिकाला तब्बल ८४ लाख ५३ हजार रुपयांचा गंडा घातल्याची धक्कादायक घटना समोर आली आहे.
जामखेड येथील कृषी सेवा केंद्र चालक उदय गुलाबराव शिंदे यांनी या प्रकरणी सायबर पोलिसांकडे तक्रार नोंदवली असून, पोलिसांनी दोन अनोळखी संशयितांविरुद्ध गुन्हा दाखल केला आहे.
मिळालेल्या माहितीनुसार, शिंदे यांनी फेसबुकवर सौरभ अग्रवाल याने टाकलेली पेट्रोल पंपाच्या डीलरशिपची जाहिरात पाहिली होती. तेथील लिंकवर प्रतिसाद दिल्यानंतर सौरभ अग्रवाल आणि स्वतःला ‘शिंदे इंजिनिअर’ म्हणवून घेणाऱ्या व्यक्तीने त्यांच्याशी संपर्क साधला.
या भामट्यांनी प्रोसेसिंग फी आणि इतर विविध मंजुरींच्या नावाखाली ऑक्टोबर २०२५ ते जुलै २०२६ या काळात तब्बल ८४ लाख ५३ हजार रुपये दोन वेगवेगळ्या बँक खात्यांवर भरण्यास भाग पाडले. विश्वास संपादन करण्यासाठी संशयितांनी प्रत्यक्ष जामखेडला येऊन जागेची पाहणी देखील केली. मात्र, पैसे बँक खात्यात जमा होताच त्यांनी संपर्क तोडला आणि मोबाईल बंद केले. आपली फसवणूक झाल्याचे लक्षात येताच शिंदे यांनी सायबर पोलिसात धाव घेतली. सध्या सायबर पोलीस ठाण्याचे निरीक्षक सागर ढिकले या प्रकरणाचा पुढील तपास करत आहेत.
महाराष्ट्र संवाद न्यूज ऑनलाईन
