कोतुळमध्ये ६ लाखांचा गुटखा व कार जप्त; पोलीस उपअधीक्षकांच्या पथकाची मोठी कारवाई

महाराष्ट्र संवाद न्यूज ऑनलाईन
अकोले: अकोले तालुक्यातील कोतुळ गावात संगमनेरच्या उपविभागीय पोलीस अधिकारी कार्यालयाच्या पथकाने मोठी कारवाई करत ६ लाख ११ हजार २३० रुपयांचा बेकायदेशीर गुटखा, सुगंधित तंबाखू आणि एक कार जप्त केली आहे. अहिल्यानगरचे पोलीस अधीक्षक मुम्मका सुदर्शन, अपर पोलीस अधीक्षक सोमनाथ वाघचौरे आणि संगमनेरचे उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली ही कारवाई करण्यात आली.
डॉ. कुणाल सोनवणे यांना कोतुळ गावातील रहिवासी शोएब शावीद काझी याने आपल्या घराजवळ एका स्विफ्ट कारमध्ये गुटखा आणि सुगंधित तंबाखू विक्रीसाठी साठा करून ठेवल्याची गोपनीय माहिती मिळाली होती. या माहितीच्या आधारे त्यांनी उपविभागीय कार्यालयाच्या पथकाला तातडीने कारवाईचे आदेश दिले.
पोलीस पथकाने पंचांसमक्ष घटनास्थळी जाऊन छापा टाकला असता, आरोपी शोएब काझी याच्या ताब्यातील स्विफ्ट गाडीमध्ये (क्रमांक MH 02 BD 7599) मोठ्या प्रमाणावर प्रतिबंधित अन्नपदार्थांचा साठा मिळून आला. या कारवाईत २५,६५० रुपये किमतीचा तुळशी जर्दा, १,२१,६८० रुपयांचा रजनीगंधा पान मसाला, ९६,००० रुपयांचा विमल पान मसाला, ४,००० रुपयांची व्ही-१ बिग तंबाखू, ३१,५०० रुपयांचा प्रीमियम आरएमडी पान मसाला (निळा) आणि ३२,४०० रुपये किमतीचा प्रीमियम आरएमडी पान मसाला (लाल) जप्त करण्यात आला. या प्रतिबंधित साठ्यासह ३ लाख रुपये किमतीची स्विफ्ट कार असा एकूण ६ लाख ११ हजार २३० रुपयांचा मुद्देमाल पोलिसांनी जप्त केला.
या प्रकरणी अकोले पोलीस ठाण्यात आरोपीविरुद्ध भारतीय न्याय संहिता २०२३ आणि अन्न सुरक्षा व मानके अधिनियम २००६ च्या विविध कलमांनुसार गुन्हा दाखल करण्यात आला असून, आरोपीसह जप्त मुद्देमाल पोलिसांच्या स्वाधीन करण्यात आला आहे.
सदर यशस्वी कारवाईमध्ये उपविभागीय पोलीस अधिकारी कार्यालयातील पोलीस अंमलदार दत्तात्रय मेंगाळ, अनिल कडलग, बापुसाहेब हांडे, राहुल सारबंदे आणि सुनिल ढाकणे यांच्या पथकाने केली.