विद्यार्थ्यांवरील लाठीहल्ल्याचा निषेध; सरकारच्या निषेधार्थ मशाल मोर्चात संगमनेरकर एकवटले, रस्त्यावर उतरले; बाळासाहेब थोरातांसह सर्व समविचारी पक्षीयांचा समावेश

महाराष्ट्र संवाद न्यूज ऑनलाईन
संगमनेर :
दिल्ली येथे आंदोलक विद्यार्थ्यांवर झालेल्या अमानुष लाठीहल्ल्याच्या निषेधार्थ संगमनेर शहर आणि तालुक्यातील हजारो नागरिक, युवक, महिला व सर्व समविचारी पक्षांचे कार्यकर्ते रस्त्यावर उतरले. पंतप्रधान, गृहमंत्री व शिक्षण मंत्री यांनी तातडीने राजीनामा द्यावा अशी मागणी घरात सरकारविरोधी घोषणांनी वातावरण दुमदुमून गेले होते. 
माजी मंत्री बाळासाहेब थोरात यांच्यासह समविचारी, महाविकास आघाडीतील घटक पक्ष असं विद्यार्थी व संगमनेरकर मोठ्या संख्येने मशाल मोर्चात सहभागी झाले होते. हा विराट मशाल मोर्चा संगमनेर बस स्थानकापासून सुरू झाला. छत्रपती शिवाजी महाराज आणि डॉ. बाबासाहेब आंबेडकर यांच्या पुतळ्यांना अभिवादन करून चावडी मार्गे हा मोर्चा महात्मा फुले स्मारकापर्यंत पोहोचला.
यावेळी झालेल्या सभेत बोलताना बाळासाहेब थोरात यांनी केंद्र सरकारवर जोरदार हल्लाबोल केला. सोनम वागचुकसारख्या आदर्श व्यक्तिमत्त्वाला आणि जंतर-मंतरवर उपोषण करणाऱ्या युवकांना केंद्र सरकार अमानुषपणे दडपण्याचा प्रयत्न करत असल्याचे त्यांनी सांगितले. संसदेत विरोधी पक्षांचा आवाज दाबला जात असून खासदार राहुल गांधी आणि प्रियंका गांधी यांच्यासारख्या नेत्यांनाही पोलिसांनी अत्यंत चुकीच्या पद्धतीने ताब्यात घेतले. देशातील स्वायत्त संस्था, न्यायालय आणि प्रसारमाध्यमांचा राजकीय वापर सुरू असून लोकशाहीचा गळा घोटला जात असल्याची घणाघाती टीका थोरात यांनी केली. तसेच सावित्रीबाई फुले यांच्यावरील मालिका आणि फुले यांच्या जीवनावरील चित्रपट बंद पाडणाऱ्या जातीयवादी शक्तींविरुद्ध युवकांनी एकजुटीने संघर्षासाठी पुढे यावे, असे आवाहन त्यांनी केले.
या वेळी बोलताना माजी आमदार डॉ. सुधीर तांबे यांनी नीट पेपरफुटीच्या मुद्द्यावरून सरकारला धारेवर धरले. केंद्र सरकारमध्ये कोणतीही नैतिकता उरलेली नसून शिक्षण मंत्री धर्मेंद्र प्रधान यांनी तातडीने राजीनामा दिला पाहिजे, अशी मागणी त्यांनी केली. देशामध्ये दररोज लोकशाहीची हत्या होत असून विद्यार्थ्यांवर लाठीमार होत असताना पंतप्रधान मौन बाळगून आहेत, हे दुर्दैवी असल्याचे ते म्हणाले.
या आंदोलनात माजी आमदार डॉ. सुधीर तांबे, दुर्गाताई तांबे, काँग्रेसचे जिल्हाध्यक्ष सचिन गुजर, वंचित बहुजन आघाडीचे अजिज व्होरा, शिवसेनेचे जिल्हा संघटक अमोल बोराडे, तालुकाध्यक्ष अजय फटांगरे, शहराध्यक्ष सोमेश्वर दिवटे, कार्याध्यक्ष अमोल शेलकर, ॲड. रंजना गवांदे, छात्र भारतीचे तुषार पानसरे, अनुराधा आहेर यांच्यासह काँग्रेस, शिवसेना (उद्धव बाळासाहेब ठाकरे), वंचित बहुजन आघाडी, छात्र भारती, NSUI, RPI, कम्युनिस्ट पक्ष, अंनिस, सत्यशोधक समाज, जय हिंद लोक चळवळ आणि एकविरा फाउंडेशन यांसारख्या विविध पुरोगामी संघटनांचे पदाधिकारी व नागरिक मोठ्या संख्येने उपस्थित होते.