अवैध वाळू वाहतूक पडली महाग! पोलीस अधीक्षकांच्या आदेशानंतर LCB ची धडक कारवाई, ५ लाखांचा मुद्देमालासह दोघे ताब्यात

महाराष्ट्र संवाद न्यूज ऑनलाईन 

अहिल्यानगर:

अहिल्यानगर जिल्ह्यात सुरू असलेल्या अवैध धंद्यांविरोधात पोलिसांनी आता कठोर भूमिका घेतली असून, स्थानिक गुन्हे शाखेने (LCB) प्रवरा नदीपात्रात धडक कारवाई करत अवैध वाळू वाहतूक करणाऱ्या दोघांच्या मुसक्या आवळल्या आहेत. पोलीस अधीक्षक मुम्मका सुदर्शन यांच्या विशेष आदेशानंतर एलसीबीच्या पथकाने श्रीरामपूर तालुका पोलीस ठाण्याच्या हद्दीत ही धाड टाकली. या कारवाईत पोलिसांनी विनाक्रमांकाचा टाटा कंपनीचा टेम्पो आणि अवैध वाळू असा एकूण ५ लाख १० हजार रुपयांचा ऐवज हस्तगत केला आहे.

मिळालेल्या माहितीनुसार, जिल्ह्यातील वाढत्या बेकायदेशीर वाळू उपशावर अंकुश ठेवण्यासाठी पोलीस अधीक्षक मुम्मका सुदर्शन यांनी स्थानिक गुन्हे शाखेला विशेष मोहीम राबवण्याचे निर्देश दिले होते. त्या अनुषंगाने एलसीबीचे पोलीस निरीक्षक संतोष मुटकुळे यांनी पोलीस अंमलदार रणजीत जाधव यांना श्रीरामपूर तालुका पोलीस ठाण्याचे अंमलदार आर. डी. ढोकणे व विनोद उंडे यांच्यासोबत कारवाईसाठी रवाना केले. हे पथक श्रीरामपूर परिसरात गस्त घालत असताना, गुप्त बातमीदाराकडून भेर्डापूर येथील अभी राऊत नावाचा इसम प्रवरा नदीपात्रातून अवैध वाळूची वाहतूक करणार असल्याची पक्की बातमी मिळाली.

माहिती मिळताच पोलीस पथकाने पंचांसमक्ष प्रवरा नदीपात्राजवळ सापळा रचला. काही वेळातच एक संशयित टेम्पो नदीच्या पात्रातून बाहेर येताना दिसला. पथकाने तत्काळ वाहनाला घेराव घालून टेम्पो थांबवला. चालकाची व वाहनाची पाहणी केली असता त्यात बेकायदेशीररीत्या साठवलेली वाळू आढळून आली. पोलिसांनी घटनास्थळावरून वाहन चालक रोहित बाळासाहेब राऊत (वय २६) आणि वाहन मालक अभिजित ऊर्फ अभी बाळासाहेब राऊत (वय २४, दोघे रा. भेर्डापूर, ता. श्रीरामपूर, जि. अहिल्यानगर) यांना ताब्यात घेतले.

या कारवाईदरम्यान ५ लाख रुपये किमतीचा विनाक्रमांकाचा टाटा टेम्पो आणि १० हजार रुपयांची अवैध वाळू असा एकूण ५ लाख १० हजार रुपये किमतीचा मुद्देमाल पोलिसांनी जप्त केला. या प्रकरणी श्रीरामपूर तालुका पोलीस ठाण्यात गु.र.नं. ३१२/२०२६ नुसार नवीन भारतीय न्याय संहिता २०२३ चे कलम ३०३(२) आणि पर्यावरण संरक्षण अधिनियम कलम ३ व १५ अन्वये गुन्हा दाखल करण्यात आला आहे. पुढील तपास श्रीरामपूर तालुका पोलीस करत आहेत.