स्थानिक गुन्हे शाखेची घारगाव हद्दीत धडक कारवाई; ५ लाखांच्या मुद्देमालासह अवैध वाळू वाहतूक करणारा आरोपी ताब्यात

महाराष्ट्र संवाद न्यूज ऑनलाईन 

संगमनेर: 

राजरोसपणे सुरू असलेल्या पठार भागातील अवैध वाळू वाहतुकीवर अहिल्यानगरच्या स्थानिक गुन्हे शाखेने मोठी कारवाई करीत पाच लाखांच्या मुद्देमालासह आरोपीला ताब्यात घेतले आहे. घारगाव पोलीस ठाण्याच्या हद्दीत करण्यात आलेल्या या कारवाईमुळे अवैध वाळू वाहतूकदारांचे धाबे दणाणले आहे.

अहिल्यानगर जिल्ह्यातील अवैध वाळू उपसा आणि वाहतुकीविरुद्ध कडक कारवाई करण्याचे आदेश पोलीस अधीक्षक मुम्मका सुदर्शन यांनी दिले होते. या आदेशानुसार स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली पोलीस उपनिरीक्षक विकास जाधव, पोलीस अंमलदार गणेश लोंढे, योगेश कर्डीले, बाळासाहेब गुंजाळ आणि रोहित येमुल यांचे पथक अवैध धंद्यांची माहिती मिळवण्यासाठी घारगाव पोलीस ठाण्याच्या हद्दीत रवाना करण्यात आले होते.

सोमवारी (१८ ऑगस्ट) पथक तपास करत असताना गोपनीय बातमीदाराकडून मिळालेल्या माहितीनुसार, मंगेश शेंडगे हा इसम अशोक लेलंड कंपनीच्या टेम्पोमधून मांडव्याकडून साकूरकडे अवैध वाळूची वाहतूक करत असल्याचे समजले. या माहितीच्या आधारे पथकाने पंचांसमक्ष संगमनेर तालुक्यातील मांडवे बुद्रुक शिवारातील हॉटेल श्रीनाथजवळ सापळा रचला. तेथे आलेला संशयित टेम्पो थांबवून तपासणी केली असता त्यात अवैध वाळू आढळून आली.

या कारवाईत पोलिसांनी वाहनचालक मंगेश धोंडीभाऊ शेंडगे (वय ३५, रा. मांडवे बुद्रुक, ता. संगमनेर, जि. अहिल्यानगर) याला ताब्यात घेतले. आरोपीच्या ताब्यातून ५,००,००० रुपये किमतीचा अशोक लेलंड कंपनीचा विनाक्रमांकचा बडा दोस्त टेम्पो आणि ८,००० रुपये किमतीची वाळू असा एकूण ५,०८,००० रुपयांचा मुद्देमाल जप्त करण्यात आला आहे.

या प्रकरणी आरोपीविरुद्ध घारगाव पोलीस ठाण्यात भारतीय न्याय संहिता २०२३ च्या कलम ३०३(२) नुसार गुन्हा नोंदवण्यात आला असून, पुढील तपास घारगाव पोलीस करत आहे.