दरोड्याचा मोठा कट उधळला: स्थानिक गुन्हे शाखेकडून लक्झरी कार, २ गावठी कट्टे आणि जिवंत काडतुसांसह ५ सराईत गुन्हेगार जेरबंद

महाराष्ट्र संवाद न्यूज ऑनलाईन 

अहिल्यानगर:

अहिल्यानगरच्या स्थानिक गुन्हे शाखेने धडक कारवाई करत दरोडा घालण्याच्या तयारीत असलेल्या ५ सराईत गुन्हेगारांच्या टोळीला बेड्या ठोकल्या आहेत. एमआयडीसी ते शेंडी जाणाऱ्या बायपास रोडवरील लवणवाडी पाटीजवळ कच्च्या रस्त्याच्या आडोशाला अंधारात थांबलेल्या या संशयितांना पोलिसांनी अत्यंत कौशल्याने ताब्यात घेतले. या कारवाईदरम्यान आरोपींकडून ३२ लाख १९ हजार १०० रुपयांचा ऐवज जप्त करण्यात आला असून, यामध्ये दोन काळया रंगाच्या आलिशान विनाक्रमांक कार (हुंदाई क्रेटा आणि टाटा हॅरियर), २ गावठी कट्टे, ४ जिवंत काडतुसे, ६ मोबाईल, लोखंडी टॉमी आणि मिरची पूड अशा मुद्देमालाचा समावेश आहे.

पोलीस अधीक्षक मुम्मका सुदर्शन यांनी जिल्ह्यातील दरोडा व जबरी चोरीच्या गुन्ह्यांना प्रतिबंध घालण्यासाठी स्थानिक गुन्हे शाखेला पेट्रोलिंगचे आदेश दिले होते. त्या पार्श्वभूमीवर स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली पोलीस उपनिरीक्षक संदीप दरवडे आणि त्यांच्या पथकाने एमआयडीसी परिसरात सापळा रचून ही मोठी कारवाई केली.

पकडण्यात आलेल्या आरोपींमध्ये शाहरूख रज्जाक शेख (वय ३४, रा. निमगाव खैरी, ता. श्रीरामपूर), इम्रान अन्वर पठाण (वय २३, रा. टाकळी, ता. कोपरगाव), तन्जीम नदिम शेख (वय २६, रा. येवला, जि. नाशिक), फिरोज चाँद शेख (वय ३५, रा. येवला, जि. नाशिक) आणि रेहान रौफ शेख (वय ३०, रा. श्रीरामपूर) यांचा समावेश आहे.

पोलिसांनी ताब्यात घेतलेल्या आरोपींची अधिक चौकशी केली असता, शाहरूख शेख आणि इम्रान पठाण या सराईत गुन्हेगारांवर यापूर्वी हत्या, दरोडा, जबरी चोरी आणि बेकायदेशीर शस्त्र बाळगल्याप्रकरणी श्रीरामपूर, कोपरगाव, लोणी, शिर्डी व इतर पोलीस ठाण्यांत अनेक गंभीर गुन्हे दाखल असल्याचे उघडकीस आले.

जप्त केलेले गावठी कट्टे व काडतुसे त्यांनी श्रीरामपूर येथील फरार आरोपी आसिफ उर्फ आश्यू पठाण आणि राजेंद्र भाऊसाहेब गांगुर्डे यांच्याकडून खरेदी केल्याची कबुली दिली आहे. याप्रकरणी एमआयडीसी पोलीस ठाण्यात भारतीय न्याय संहिता २०२३ चे कलम ३१० (४), ३१० (५) सह आर्म ॲक्टनुसार गुन्हा नोंदवण्यात आला असून, फरार आरोपींचा शोध आणि पुढील तपास एमआयडीसी पोलीस करत आहेत.