शहरातील पाईपलाईन रोड भागात पत्रकाराला बेदम मारहाण करून जीवे मारण्याचा प्रयत्न करणाऱ्या कुख्यात गुन्हेगार टोळीविरुद्ध तोफखाना पोलिसांनी आता कडक कायदेशीर कारवाई केली आहे. टोळीची गुन्हेगारी पार्श्वभूमी आणि सततची दहशत लक्षात घेता पोलिसांनी या गुन्ह्यात भारतीय न्याय संहिता २०२३ चे संघटित गुन्हेगारीविरोधी ‘कलम १११’ हे वाढीव कलम जोडले आहे. या कारवाईमुळे अहिल्यानगरमधील या सराईत गुन्हेगारांचे कंबरडे मोडले असून नागरिकांमधील भीतीचे वातावरण दूर होण्यास मदत होणार आहे.
गुरुवारी (२० ऑगस्ट) फिर्यादीचे सुपुत्र सार्थक थोरात हे आपल्या मारुती आल्टो कारने भिस्तबाग चौक ते एकविरा चौकाकडे जात होते. त्यावेळी मोपेड मोटरसायकलवरील चालकाने कारला पाठीमागून धडक दिली आणि सार्थक यांच्याशी शिवीगाळ करण्यास सुरुवात केली. सार्थक यांनी या घटनेबाबत आपले वडील पत्रकार सुशिल थोरात यांना कळवले. सुशिल थोरात हे तात्काळ एचडीएफसी बँकेजवळ घटनास्थळी पोहोचले.
तेथे उपस्थित असलेल्या सराईत गुन्हेगारांनी पत्रकार सुशिल थोरात यांना देखील शिवीगाळ करत दगडाने त्यांच्या डोक्यात प्रहार केला. एवढ्यावरच न थांबता, आरोपींनी त्यांचे हात-पाय धरून गळा दाबून जीवे मारण्याचा प्रयत्न केला तसेच त्यांच्या मुलाला देखील लाथाबुक्क्यांनी बेदम मारहाण करत जीवे मारण्याची धमकी दिली. याप्रकरणी तोफखाना पोलीस ठाण्यात गुन्हा नोंदवून तपासाची चक्रे वेगाने फिरवण्यात आली.
तीन सराईत आरोपींना अटक
या गंभीर गुन्ह्याचा तपास करत पोलिसांनी सोनू उर्फ हेमंत दत्तात्रय कोहक (वय २७, रा. बोलहेगाव), महेश उर्फ पप्पू दशरथ मते (वय २७, रा. पाईपलाईन रोड) आणि प्रशांत शिवाजी निक्रद (वय २८, रा. तागड वस्ती) या तीन आरोपींना २४ ऑगस्ट २०२६ रोजी बेड्या ठोकल्या. न्यायालयाने या आरोपींना २८ ऑगस्ट २०२६ पर्यंत पोलीस कोठडी मंजूर केली आहे.
या टोळीवर तोफखाना आणि पारनेर पोलीस ठाण्याच्या हद्दीत खुनाचा प्रयत्न, फसवणूक आणि जबरी मारहाण यांसारखे १३ गंभीर गुन्हे आधीपासूनच दाखल आहेत. प्रतिबंधात्मक कारवाई करूनही या गुन्हेगारांच्या वर्तनात कोणताही सुधार झाला नव्हता. ते शहरात नियमितपणे गंभीर स्वरूपाचे गुन्हे करत दहशत पसरवत होते. या टोळीचा समूळ उच्चाटन करण्यासाठी आणि त्यांची गुन्हेगारी मोडून काढण्यासाठी तोफखाना पोलिसांनी अपर पोलीस अधीक्षक वैभव कल्लुर्मे यांच्याकडे भारतीय न्याय संहिता २०२३ चे ‘कलम १११’ (संघटित गुन्हेगारी) हे वाढीव कलम लावण्याचा प्रस्ताव सादर केला होता. या प्रस्तावाला मंजुरी मिळाल्यानंतर गुन्ह्यात हे कडक कलम समाविष्ट करण्यात आले आहे.
