५ लाख २५ हजार ५११ भाविकांनी एकाच वेळी “वंदे मातरम्”चे सामूहिक गायन करून नवा विश्वविक्रम

Annant Ppangarkar

महाराष्ट्र संवाद न्यूज ऑनलाईन

अहिल्यानगर:

महाराष्ट्रातील अहिल्यानगर येथील श्री क्षेत्र धनगरवाडी येथे संत योगीराज सद्गुरु श्री गंगागिरी महाराज यांच्या १७९व्या अखंड हरिनाम सप्ताहाचे आयोजन करण्यात आले आहे. २५ ऑगस्ट २०२६ रोजी श्रीक्षेत्र सरला बेटचे विद्यमान मठाधिपती महंत श्री रामगिरी महाराज यांच्या आयोजनाखाली एकूण ५ लाख २५ हजार ५११ भाविकांनी एकाच वेळी “वंदे मातरम्”चे सामूहिक गायन करून नवा विश्वविक्रम प्रस्थापित केला.

यापूर्वीचा विश्वविक्रम-

“वंदे मातरम्”चे एकाच वेळी सर्वाधिक लोकांनी केलेल्या सामूहिक गायनाचा यापूर्वीचा विश्वविक्रम १ लाख ४ हजार ६३७ सहभागींच्या नावावर होता. हा विक्रम १२ जानेवारी २०१० रोजी पुणे येथे द आर्ट ऑफ लिव्हिंग फाउंडेशनने आयोजित केलेल्या “अंतर्नाद” या संगीत कार्यक्रमात नोंदविण्यात आला होता.

विश्वविक्रमाचे प्रमाणपत्र प्रदान-

या विश्वविक्रमाचे प्रमाणपत्र श्रीक्षेत्र सरला बेटचे मठाधिपती महंत श्री रामगिरी महाराज यांना विनर्स बुक ऑफ रेकॉर्ड्स वर्ल्डचे अध्यक्ष आणि १८४ विश्वविक्रम करणारे पहिले भारतीय डॉ. दीपक हरके, महाराष्ट्राचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते प्रदान करण्यात आले.

मिस इंडिया आणि विनर्स बुक ऑफ वर्ल्ड रेकॉर्ड्सच्या चेअरमन डॉ. ईशा अग्रवाल यांनीही सरला बेटचे मठाधिपती महंत रामगिरी महाराज यांचे या ऐतिहासिक कामगिरीबद्दल अभिनंदन केले.

या कार्यक्रमास अनेक मान्यवरांची उपस्थिती होती. यामध्ये श्रीक्षेत्र सरला बेटचे विश्वस्त व मार्गदर्शक मधु महाराज, अहिल्यानगर जिल्ह्याचे पालकमंत्री राधाकृष्ण विखे पाटील, शिर्डी लोकसभा मतदारसंघाचे खासदार भाऊसाहेब राजाराम वाकचौरे, आमदार विवेक कोल्हे, कोपरगाव विधानसभा मतदारसंघाचे आमदार आशुतोष अशोकराव काळे, वैजापूर विधानसभा मतदारसंघाचे आमदार रमेश बोरनारे, संगमनेर विधानसभा मतदारसंघाचे आमदार अमोल खताळ, नेवासा विधानसभा मतदारसंघाचे विद्यमान आमदार विठ्ठल लंघे तसेच काँग्रेसचे ज्येष्ठ नेते बाळासाहेब थोरात यांचा समावेश होता.