स्थानिक गुन्हे शाखेने अहिल्यानगर, कर्जत आणि राहुरी पोलीस स्टेशनच्या हद्दीत अवैध गुटखा व मावा विक्री करणाऱ्यांविरोधात धडक मोहीम उघडून एकाच दिवशी ६ विविध ठिकाणी यशस्वी छापे टाकले असून, यामध्ये सुमारे ५ लाख ९५ हजार ९१५ रुपये किमतीचा सुगंधी तंबाखू, गुटखा आणि माव्याचा साठा जप्त करण्यात आला आहे. या प्रकरणी १५ आरोपींवर विविध कलमांन्वये एकूण ६ गुन्हे दाखल करण्यात आले आहेत.
जिल्ह्यातील अवैध धंद्यांचे समूळ उच्चाटन करण्यासाठी स्थानिक गुन्हे शाखेचे पोलीस निरीक्षक संतोष मुटकुळे यांनी पोलीस अंमलदारांची चार विशेष पथके तयार केली होती. या पथकांनी शनिवारी (२९ ऑगस्ट) गुप्त माहितीच्या आधारे एमआयडीसी, भिंगार कॅम्प, कर्जत आणि राहुरी पोलीस ठाण्याच्या हद्दीत छापे टाकले.
एमआयडीसी पोलीस ठाण्याच्या हद्दीत पहिल्या कारवाईत १ लाख २० हजार ६०० रुपयांचा मुद्देमाल जप्त करून वडगाव गुप्ता येथील सचिन बबन डोंगरे (वय ४१) याला ताब्यात घेण्यात आले, तर मुकुंदनगरचा कय्युम शेख पसार झाला. याच हद्दीतील दुसऱ्या कारवाईत नागापूर येथील सतीश सुखदेव तोडमल (वय ३९) याच्याकडून २ हजार ५५५ रुपयांचा माल जप्त करण्यात आला असून अजझर पठाण फरार आहे.
भिंगार कॅम्प हद्दीत सर्वात मोठी कारवाई करण्यात आली. तेथून ४ लाख ४५ हजार २०० रुपयांचा मुद्देमाल जप्त करत विळदघाट येथील ज्ञानेश्वर रमेश गायकवाड (वय ३६), नवनागापूरचा अमर शिवाजी ताठे (वय २३) आणि मुकुंदनगरचा शाफीन आरीफ शेख (वय २१) यांना अटक करण्यात आली. या कारवाईत बीडचा ऋषी काटकर आणि झेंडीगेटचा अल्तमश सय्यद हे दोघे पसार होण्यात यशस्वी झाले.
कर्जत पोलीस ठाण्याच्या हद्दीत खेड येथील गोविंद काळुराम जाधव (वय २९) याच्याकडून २ हजार १६० रुपयांचा, तर उमर अस्लम शेख (वय २७) याच्याकडून २ हजार ४०० रुपयांचा साठा जप्त करण्यात आला. या दोन्ही कारवायांमध्ये भिगवण येथील धीरज कवितके आणि अभि कवितके हे फरार घोषित झाले आहेत. राहुरी पोलीस ठाण्याच्या हद्दीत डिग्रस येथील शोएब महमंद शेख (वय ३६) याला अटक करून २३ हजार रुपयांचा मुद्देमाल जप्त केला गेला, तर सोनईचा फारूक पठाण पसार झाला आहे.
पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेच्या पथकाने ही धडक कामगिरी केली असून, सर्व फरार आरोपींचा शोध सुरू आहे. जिल्ह्यात अवैध धंदे करणाऱ्यांवर यापुढेही अशीच कठोर कारवाई सुरू राहील असा इशारा पोलीस प्रशासनाने दिला आहे.
