पोलिसांच्या ताब्यात असलेल्या तरुणाला आमदार खताळ यांच्या कार्यकर्त्याकडून मारहाण; संदेश देशमुख यांच्यावर एनसी दाखल

Annant Ppangarkar

महाराष्ट्र संवाद न्यूज ऑनलाईन 

(विशेष प्रतिनिधी):

संगमनेर शहरातील खांडेश्वर मंदिरात दर्शनासाठी आलेल्या एका तरुणाला पोलिसांच्या देखत मारहाण करण्यात आल्याचा धक्कादायक प्रकार समोर आला आहे. संगमनेरचे आमदार अमोल खताळ यांचे समर्थक संदेश बाळासाहेब देशमुख यांनी पोलिसांच्या ताब्यात असलेल्या प्रसाद आप्पासाहेब गुंजाळ (वय २८, रा. खांडगाव) या तरुणाच्या गालावर चापटा मारून दुखापत केली व जिवे मारण्याची धमकी दिली. याप्रकरणी संगमनेर शहर पोलीस ठाण्यात संदेश देशमुख यांच्याविरुद्ध एनसीआर (N.C.R.) दाखल करण्यात आला आहे.

मिळालेल्या माहितीनुसार, ३१ ऑगस्ट २०२६ रोजी सकाळी १०:०० वाजण्याच्या सुमारास खांडगाव येथील शेतकरी प्रसाद गुंजाळ हे नेहमीप्रमाणे खांडेश्वर मंदिरात दर्शनासाठी गेले होते. दर्शन घेऊन मंदिराच्या बाहेरील पटांगणात बसलेले असताना, पोलीस निरीक्षक समीर बारवकर हे त्यांच्या पथकासह तेथे पोहोचले. त्यांनी आमदार अमोल धोंडिबा खताळ (वय ४८) हे दर्शनासाठी येणार असल्याचे सांगत प्रसाद गुंजाळ यांना मंदिराच्या पटांगणातून बाहेर घेऊन आले.

त्यानंतर पोलिसांनी प्रसाद गुंजाळ यांना ताब्यात घेऊन पोलीस गाडीकडे नेण्यास सुरुवात केली. त्याच वेळी आमदार अमोल खताळ यांचे सहकारी संदेश बाळासाहेब देशमुख (रा. राजापूर, ता. संगमनेर) तिथे आले. पोलिसांच्या ताब्यात असलेल्या प्रसाद यांच्याशी त्यांनी कोणत्याही कारणाशिवाय हुज्जत घातली. संदेश देशमुख यांनी प्रसाद यांच्या डाव्या डोळ्यावर आणि डाव्या गालावर दोन-तीन चापटा मारून दुखापत केली तसेच जिवे मारण्याची धमकी दिली.

त्यावेळी उपस्थित पोलिसांनी संदेश देशमुख यांच्या तावडीतून प्रसाद गुंजाळ यांची सुटका केली. मारहाणीत दुखापत झाल्यामुळे पोलिसांनी गुंजाळ यांना तात्काळ ग्रामीण रुग्णालय घुलेवाडी येथे वैद्यकीय तपासणीसाठी नेले.

उपचारानंतर गुंजाळ यांच्या तक्रारीवरून संगमनेर शहर पोलीस ठाण्यात संदेश बाळासाहेब देशमुख यांच्याविरुद्ध भारतीय न्याय संहिता (BNS) २०२३ च्या कलम ११५(२) आणि ३५२ अन्वये एनसीआर नंबर ११५५/२०२६ नोंदवण्यात आला आहे. या प्रकरणाचा पुढील तपास पोलीस अंमलदार जी. सोनवणे करत आहेत.