पोलिसांचा वाळू माफियांना मोठा धक्का; या दोन तालुक्यातून २० लाखांचा मुद्देमाल जप्त

Annant Ppangarkar

महाराष्ट्र संवाद न्यूज ऑनलाईन:

जिल्ह्यातील अवैध वाळू उपसा आणि वाहतुकीवर चाप लावण्यासाठी पोलीस दलाने धडक कारवाई सुरू केली आहे. स्थानिक गुन्हे शाखेच्या पथकाने श्रीरामपूर आणि राहाता पोलीस ठाण्याच्या हद्दीत दोन वेगवेगळ्या ठिकाणी छापे टाकून वाळू माफियांविरुद्ध मोठी कारवाई केली. या कारवाईत पोलिसांनी एकूण २० लाख ३० हजार रुपये किमतीचा मुद्देमाल जप्त केला असून चार आरोपींविरुद्ध पाच गुन्हे दाखल केले आहेत.

पोलीस अधीक्षक मुम्मका सुदर्शन यांनी जिल्ह्यातील अवैध वाळू वाहतुकीविरुद्ध कठोर पावले उचलण्याचे निर्देश स्थानिक गुन्हे शाखेला दिले होते. या सूचनेनुसार पोलीस निरीक्षक संतोष मुटकुळे यांच्या मार्गदर्शनाखाली गणेश लोंढे, निळकंठ कारखेले, रणजीत जाधव, बाळासाहेब गुंजाळ आणि सतीष भवर यांच्या पथकाने १ सप्टेंबर २०२६ रोजी ही गुप्त कारवाई केली.

श्रीरामपूर तालुका आणि राहाता परिसरात मिळालेल्या माहितीच्या आधारे पथकाने अचानक छापे टाकून वाळू वाहतूक करणाऱ्यांचे धाबे दणाणले. या कारवाईत श्रीरामपूर तालुका पोलीस ठाण्यात गुन्हा दाखल करून सम्राटनगर येथील रोमन सलीम पठाण याला ताब्यात घेण्यात आले, तर त्याचा साथीदार आकाश परदेशी हा फरार झाला. या ठिकाणाहून ५ लाख १० हजार रुपयांचा मुद्देमाल जप्त करण्यात आला.

दुसऱ्या कारवाईत राहाता पोलीस ठाण्याच्या हद्दीतून पुणतांबा येथील जावेद नजीर शेख आणि शिर्डी येथील फरियाद उर्फ गुड्डू फिरोज शेख यांना ताब्यात घेण्यात आले असून त्यांच्याकडून १५ लाख २० हजार रुपयांचा मुद्देमाल हस्तगत करण्यात आला आहे.