अहिल्यानगर जिल्ह्यात अवैध गुटखा विक्रीवर स्थानिक गुन्हे शाखेची मोठी कारवाई; ५.३० लाखांचा मुद्देमाल जप्त, ११ जणांवर गुन्हे दाखल

Annant Ppangarkar

महाराष्ट्र संवाद न्यूज ऑनलाईन:

जिल्ह्यातील अवैध गुटखा, सुगंधीत तंबाखू आणि मावा विक्री करणाऱ्या व्यावसायिकांवर स्थानिक गुन्हे शाखेच्या पथकाने मोठी कारवाई केली आहे. पाथर्डी, एम.आय.डी.सी. आणि कोतवाली पोलीस ठाण्याच्या हद्दीत वेगवेगळ्या चार ठिकाणी छापे टाकून पोलिसांनी एकूण ५ लाख ३० हजार १४६ रुपये किंमतीचा साठा जप्त केला आहे. या कारवाईत तब्बल ११ आरोपींवर गुन्हे दाखल करण्यात आले आहेत.

पोलीस अधीक्षक मुम्मका सुदर्शन यांनी जिल्ह्यातील अवैध धंद्यांचे समूळ उच्चाटन करण्याचे आदेश दिले होते. त्या पार्श्वभूमीवर स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली विजय ठोंबरे, अतुल लोटके, राहुल द्वारके, सागर ससाणे, रोहित येमुल, गणेश लोंढे, निळकंठ कारखेले, रणजित जाधव, सतिष भवर आणि बाळासाहेब गुंजाळ या अंमलदारांची तीन विशेष पथके तयार करण्यात आली होती. या पथकांनी २ आणि ३ सप्टेंबर रोजी पाथर्डी, एम.आय.डी.सी. तसेच कोतवाली परिसरात शोधमोहीम राबवून अवैध साठा जप्त केला.

पाथर्डी पोलीस ठाण्याच्या हद्दीत टाकलेल्या दोन वेगवेगळ्या छाप्यांतून ८१ हजार ४०० रुपये आणि १ लाख १८ हजार ४७० रुपयांचा मुद्देमाल जप्त करण्यात आला. यात आकाश अशोक चातुर आणि नेहाल शफिक आतार यांना ताब्यात घेण्यात आले असून, श्रीरामपूर येथील फरदीन रफीक शेख आणि रिजवान अमीन शेख हे दोघे फरार झाले आहेत.

त्याचप्रमाणे एम.आय.डी.सी. पोलीस ठाण्याच्या हद्दीत कारवाई करत पोलिसांनी २ लाख ३२ हजार रुपयांचा मुद्देमाल जप्त केला. येथे अमोल सुनिल शिंदे आणि शफीक यासीन शेख या दोघांना अटक करण्यात आली असून गणेश कोलते व किशोर कोलते हे दोघे पसार झाले. कोतवाली पोलीस ठाण्याच्या हद्दीत ९८ हजार २७६ रुपयांच्या मुद्देमालासह अर्शद बाबा बागवान याला ताब्यात घेण्यात आले, तर जाहिब मुश्ताक खान आणि शोयेब मुश्ताक खान हे दोघे फरार झाले आहेत.

सर्व आरोपींविरोधात भारतीय न्याय संहितेच्या (BNS) संबंधित कलमांनुसार गुन्हे दाखल करण्यात आले असून पसार झालेल्या आरोपींचा पोलीस शोध घेत आहेत. ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेच्या पथकाने पार पाडली.