अखिल भारतीय मराठी नाट्य परिषदेतर्फे ‘नाट्य परिषद करंडक’ राज्यस्तरीय एकांकिका स्पर्धेचे आयोजन; १८ सप्टेंबरपर्यंत अर्ज करण्याचे आवाहन

Annant Ppangarkar

मुंबई/अहिल्यानगर:

अखिल भारतीय मराठी नाट्य परिषद (मध्यवर्ती), मुंबई यांच्या वतीने ‘अखिल भारतीय मराठी नाट्य संमेलना’निमित्त सुरू झालेल्या ‘नाट्यकलेचा जागर’ या उपक्रमांतर्गत यंदा सलग तिसऱ्या वर्षी ‘नाट्य परिषद करंडक’ या भव्य राज्यस्तरीय खुल्या एकांकिका स्पर्धा महोत्सवाचे आयोजन करण्यात आले आहे. महाराष्ट्रातील सर्व जिल्ह्यांमधील कलावंत आणि नाट्यकर्मींसाठी ही स्पर्धा खुली असून, यामध्ये राज्यातील जास्तीत जास्त कलाकारांनी सहभागी व्हावे, असे आवाहन नाट्य परिषदेचे अध्यक्ष प्रशांत दामले आणि उपाध्यक्ष (उपक्रम) भाऊसाहेब भोईर यांनी केले आहे.

ही स्पर्धा प्राथमिक, विभागीय आणि अंतिम अशा तीन फेऱ्यांमध्ये पार पडणार आहे. प्राथमिक फेरी सप्टेंबर अखेर विविध केंद्रांवर आयोजित केली जाणार असून, किमान १० प्रवेशिका येणाऱ्या प्रत्येक जिल्ह्यात स्पर्धेचे केंद्र दिले जाईल. स्पर्धेची अंतिम फेरी २८ ऑक्टोबर २०२६ रोजी मुंबई येथील यशवंतराव चव्हाण नाट्यसंकुल (माटुंगा-माहिम) येथे रंगणार आहे. अंतिम फेरीत प्रवेश मिळवणाऱ्या कलावंतांसाठी नाट्य क्षेत्रातील दिग्गज दिग्दर्शक व कलाकारांच्या मार्गदर्शनाखाली विशेष नाट्य कार्यशाळेचे आयोजन केले जाईल. तसेच, सर्वोत्कृष्ट ठरणाऱ्या एकांकिकेचे व्यावसायिक नाटकात रुपांतर करण्यासाठी नाट्य परिषद विशेष प्रयत्न करणार आहे. यापूर्वी या स्पर्धेत प्रथम आलेली “चिरंजीव परफेक्ट बिघडलाय” ही एकांकिका व्यावसायिक रंगभूमीवर आली असून तिचे तब्बल १०० प्रयोग यशस्वीरीत्या पूर्ण झाले आहेत.

स्पर्धेतील सर्वोत्कृष्ट एकांकिकेस १ लाख रुपये, द्वितीय क्रमांकास ७५ हजार रुपये, तृतीय क्रमांकास ५० हजार रुपये आणि दोन उत्तेजनार्थ पारितोषिके प्रत्येकी १५ हजार रुपये दिली जाणार आहेत. याशिवाय लेखन, दिग्दर्शन, अभिनय, नेपथ्य, प्रकाश योजना, पार्श्वसंगीत, आणि वेशभूषा-रंगभूषा या वैयक्तिक विभागांसाठीही आकर्षक रोख पारितोषिके व सर्व सहभागींना प्रमाणपत्रे प्रदान करण्यात येतील.

स्पर्धेची प्रवेश प्रक्रिया पूर्णपणे ऑनलाइन असून, प्रवेश अर्ज भरण्याची अंतिम तारीख १८ सप्टेंबर २०२६ आहे. एकांकिका स्पर्धेची नियमावली व अधिक माहिती www.natyaparishad.org या संकेतस्थळावर उपलब्ध आहे. अहिल्यानगर केंद्रासाठी समन्वयक अनंत जोशी (९४२२२२६३६२) व प्रशांत जठार यांच्याशी तर अधिक माहितीसाठी मुंबई मध्यवर्ती कार्यालयाशी (८५९१७०६८८७) संपर्क साधण्याचे आवाहन नाट्य परिषदेच्या पदाधिकाऱ्यांनी केले आहे.