जयहिंद कला महोत्सव: १२ हजार विद्यार्थ्यांचा उत्स्फूर्त सहभाग; कौशल्यपूर्ण शिक्षणासाठी उपक्रम राज्यासाठी दिशादर्शक – माजी मंत्री बाळासाहेब थोरात

Annant Ppangarkar
महाराष्ट्र संवाद न्यूज ऑनलाईन :
शिक्षणाबरोबरच विद्यार्थ्यांमधील सुप्त कलागुणांना वाव देण्यासाठी जयहिंद लोकचळवळीच्या वतीने आयोजित करण्यात आलेला दोन दिवसीय कला महोत्सव अत्यंत यशस्वी ठरला असून, या शिबिरात तालुक्यातील सुमारे १२ हजार विद्यार्थ्यांनी उत्स्फूर्त सहभाग नोंदवला. अशा उपक्रमांमुळे विद्यार्थ्यांच्या कौशल्य विकासाला मोठी चालना मिळत असून, हा कला महोत्सव संपूर्ण महाराष्ट्रासाठी दिशादर्शक ठरेल, असा विश्वास राज्याचे माजी मंत्री बाळासाहेब थोरात यांनी व्यक्त केला.
सहकार महर्षी भाऊसाहेब थोरात क्रीडा संकुल येथे पार पडलेल्या या कला महोत्सवाच्या पारितोषिक वितरण समारंभात ते प्रमुख मार्गदर्शक म्हणून बोलत होते. कार्यक्रमाच्या अध्यक्षस्थानी माजी आमदार डॉ. सुधीर तांबे होते. व्यासपीठावर डॉ. नामदेव गुंजाळ, समन्वयक प्रकाश पारखे, मुख्याध्यापक चांगदेव खेमनर, संजय मासाळ, विकास भालेराव, कला संघटनेचे अध्यक्ष संतोष गोरे, राजू गोरे, विनोद राऊत, हस्ताक्षर आर्टिस्ट सिसोदे, दत्ता बटवाल, संजय सोनवणे, बजरंग जेडगुले, साहेबराव गुंजाळ आणि सुनील कवडे यांच्यासह विविध क्षेत्रांतील पदाधिकारी उपस्थित होते.
दोन दिवस चाललेल्या या भव्य महोत्सवात विविध स्पर्धा आणि नाविन्यपूर्ण प्रशिक्षण उपक्रमांचे आयोजन करण्यात आले होते. रंगभरण स्पर्धेत तालुक्यातील साडेचार हजार विद्यार्थ्यांनी सहभाग नोंदवून आपल्या कल्पकतेला रंग दिले, तर ८३० विद्यार्थ्यांनी पर्यावरणपूरक गणपती मूर्ती निर्मितीचे प्रात्यक्षिक सादर केले. याशिवाय मातीकाम, पेंटिंग, वॉटर कलर, संगीत, गायन, नृत्य, झुम्बा डान्स, थ्रीडी पेंटिंग, बाहुली काम, कॅलिग्राफी आणि थेट ड्रोन ऑपरेटर प्रशिक्षणासारख्या आधुनिक आणि कौशल्यपूर्ण विषयांचे धडे विद्यार्थ्यांना तज्ज्ञांकडून देण्यात आले.
आपल्या भाषणात पुढे बोलताना बाळासाहेब थोरात म्हणाले की, जयहिंद लोकचळवळ निरोगी समाज आणि समृद्ध भावी पिढी घडवण्यासाठी निरंतर कार्य करत आहे. राष्ट्रीय शैक्षणिक धोरण २०२० च्या उद्दिष्टांनुसार विद्यार्थ्यांमध्ये कौशल्य विकास वाढीस लागावा, याच हेतूने या कला महोत्सवाचे आयोजन करण्यात आले होते. संगमनेरमधील विद्यार्थ्यांना जास्तीत जास्त संधी उपलब्ध करून देण्यासाठी आपण कटिबद्ध असून, या महोत्सवातून भविष्यात विविध क्षेत्रांत नाव उज्वल करणारे यशस्वी तरुण आणि कलाकार घडतील, असेही त्यांनी नमूद केले.
अध्यक्षीय भाषणात माजी आमदार डॉ. सुधीर तांबे यांनी सांगितले की, केवळ अभ्यासात परिपूर्ण नसून समृद्ध आणि सुजाण नागरिक घडवणे हे या चळवळीचे मुख्य ध्येय आहे. या शिबिरात शिकवण्यात आलेल्या लहान-सहान कला आणि कौशल्यांचा उपयोग विद्यार्थ्यांना त्यांच्या भावी आयुष्यात नक्कीच होईल. या दोन दिवसांच्या प्रशिक्षणातूनच उद्याचे मोठे कलाकार निर्माण होतील, असा ठाम विश्वास त्यांनी व्यक्त केला.
कार्यक्रमाचे प्रास्ताविक डॉ. नामदेव गुंजाळ यांनी केले, सूत्रसंचालन प्रकाश पारखे यांनी सांभाळले तर चांगदेव खेमनर यांनी उपस्थितांचे आभार मानले. या सोहळ्यास संगमनेर शहरातील नागरिक, कार्यकर्ते आणि तरुण मोठ्या संख्येने उपस्थित होते.