संगमनेरात बालकला महोत्सवाचे उत्साहात उद्घाटन; बालगोपाळांच्या कलागुणांना मिळाले हक्काचे व्यासपीठ!

Annant Ppangarkar

महाराष्ट्र संवाद न्यूज ऑनलाईन –
विद्यार्थ्यांमधील सर्जनशीलता, सुप्त कलागुण आणि विविध कौशल्यांना प्रोत्साहन देण्यासाठी जयहिंद लोकचळवळ या संस्थेच्या वतीने संग्राम संस्थेचे विश्वस्त स्व. डॉ. देवेंद्र ओहरा यांच्या ३३ व्या जयंतीनिमित्त आयोजित ‘बालकला महोत्सवा’चे संगमनेर येथील स्व. सहकारमहर्षी भाऊसाहेब थोरात क्रीडा संकुलात उत्साहपूर्ण वातावरणात उद्घाटन झाले. 
आमदार डॉ. सुधीर तांबे यांच्या संकल्पनेतून साकारलेल्या या महोत्सवाचे उद्घाटन नगरपालिकेच्या माजी नगराध्यक्ष तथा जयहिंद महिला मंचच्या अध्यक्ष दुर्गाताई तांबे यांच्या हस्ते पार पडले. या कार्यक्रमाच्या अध्यक्षस्थानी जयहिंद लोकचळवळीचे सेक्रेटरी डॉ. नामदेवराव गुंजाळ होते.
कार्यक्रमाचे प्रास्ताविक करताना डॉ. नामदेवराव गुंजाळ यांनी महोत्सवाची पार्श्वभूमी स्पष्ट केली. स्व. डॉ. देवेंद्र ओहरा यांच्या शैक्षणिक व सामाजिक कार्याची स्मृती कायम तेवत राहावी, या उदात्त हेतूने आमदार डॉ. सुधीर तांबे यांनी हा बालकला महोत्सव सुरू केला असून गेल्या अनेक वर्षांपासून तो अविरत व यशस्वीरीत्या राबवला जात असल्याचे त्यांनी सांगितले.
या महोत्सवाच्या माध्यमातून तालुक्यातील हजारो विद्यार्थ्यांना आपल्या कलागुणांना वाव देण्यासाठी एक सशक्त व्यासपीठ उपलब्ध झाले असून, या उपक्रमात सहभागी होणाऱ्या सर्व शाळा, मुख्याध्यापक, शिक्षक आणि बालकलाकारांचे त्यांनी आभार मानले.
उद्घाटन प्रसंगी बोलताना दुर्गाताई तांबे म्हणाल्या की, डॉ. सुधीर तांबे आणि स्व. डॉ. देवेंद्र ओहरा यांच्यातील नाते केवळ मैत्रीपुरते मर्यादित नसून ते अगदी सख्या भावांप्रमाणे निस्वार्थी व निर्मळ होते. काळाच्या ओघातही तांबे व ओहरा परिवारातील ही आपुलकी कायम असून आमचे कुटुंब ओहरा परिवाराच्या प्रत्येक सुख-दुःखात खंबीरपणे पाठीशी उभे आहे. मंचावर आपली कला सादर करणाऱ्या सर्व गुणी बालकलाकारांच्या उत्साहाचे कौतुक करत त्यांनी सर्व सहभागी विद्यार्थ्यांना उज्ज्वल भविष्यासाठी शुभेच्छा दिल्या.
राष्ट्रीय शैक्षणिक धोरण २०२० च्या उद्दिष्टांनुसार विद्यार्थ्यांमध्ये व्यावहारिक व कलात्मक कौशल्ये विकसित करणे हा या महोत्सवाचा मुख्य हेतू आहे. या महोत्सवात विद्यार्थ्यांसाठी चित्रकला, निसर्गचित्र, मातीकाम, पर्यावरणपूरक गणेशमूर्ती निर्मिती, कागदी फुले तयार करणे, लॅण्ड अँड हॅण्ड, डूडल आर्ट, ३D प्रिंटिंग, ड्रोन ऑपरेटर प्रशिक्षण, संगीत, कॅलिग्राफी, वॉटर कलर आर्ट, बाहुली काम आणि झुंबा डान्स यांसारख्या विविध कलात्मक व तंत्रज्ञानाधारित उपक्रमांची मोठी रेलचेल पाहायला मिळत आहे. प्रात्यक्षिके आणि स्पर्धांनंतर उत्कृष्ट कामगिरी करणाऱ्या बालकलाकारांचा विशेष पारितोषिक वितरण सोहळ्यात मान्यवरांच्या हस्ते गौरव करण्यात येणार आहे.
याप्रसंगी ॲड. सुहास आहेर, सहकारमहर्षी भाऊसाहेब थोरात साखर कारखान्याचे संचालक अंकुश ताजणे, ओहरा परिवार, रू. दा. मालपाणी विद्यालयाचे मुख्याध्यापक एरंडे सर, सिद्धार्थ विद्यालयाचे मुख्याध्यापक रघुनाथ जगताप, निसर्गचित्र कलाकार प्रा. राहुल पगारे, लॅण्ड अँड हॅण्डचे नवले सर आणि कागदी फूल कलाकार सरोदे यांच्यासह शिक्षण व कला क्षेत्रातील विविध मान्यवर मोठ्या संख्येने उपस्थित होते.
महोत्सवाचे नियोजन प्रकल्प प्रमुख प्रकाश पारखे सर यांच्या नेतृत्वाखाली पार पडत असून त्यांना कलाध्यापक संघाचे अध्यक्ष संतोष गोरे आणि सचिव रावताळे सर यांचे विशेष सहकार्य लाभले आहे. तसेच कार्यक्रमाच्या यशस्वीतेसाठी श्रीमती संगीता शेळके, रवींद्र खाटेकर, बोमले, परीक्षक विजय थोरात, संजय मासाळ, भालेराव विकास, प्राचार्य चांगदेव खेमनर, प्राचार्य सुनील कवडे, आल्ले सर आणि बजरंग जेडगुले यांच्यासह कलाध्यापक संघातील पदाधिकारी व कार्यकर्ते परिश्रम घेत आहेत. संगमनेर शहर व परिसरातील विद्यार्थी, पालक आणि कलाप्रेमींनी या अनोख्या उपक्रमाला भेट देऊन उत्स्फूर्त प्रतिसाद द्यावा, असे आवाहन आयोजकांच्या वतीने करण्यात आले आहे.