संगमनेरात जयहिंद लोकचळवळीच्या वतीने उद्या आणि परवा बालकला महोत्सवाचे आयोजन; विविध उपक्रमांसह रंगभरण स्पर्धेची पर्वणी

Annant Ppangarkar

महाराष्ट्र संवाद न्यूज ऑनलाईन-

संगमनेर तालुक्यातील विद्यार्थ्यांच्या सुप्त कलागुणांना वाव देण्यासाठी जयहिंद लोकचळवळ आणि संगमनेर तालुका कला शिक्षक संघटनेच्या संयुक्त विद्यमाने रविवारी, (६ सप्टेंबर) आणि सोमवारी, (७ सप्टेंबर) दोन दिवसीय ‘बालकला महोत्सवा’चे भव्य आयोजन करण्यात आले आहे. 

सहकार महर्षी भाऊसाहेब थोरात क्रीडा संकुल येथे होणाऱ्या या महोत्सवात विद्यार्थ्यांसाठी प्रात्यक्षिकासह मातीकाम, पेंटिंग, ड्रोन ऑपरेटर प्रशिक्षण, वॉटर कलर, संगीत, झुम्बा डान्स, कागदी फुले तयार करणे, थ्रीडी पेंटिंग, डूडल आर्ट, कॅलिग्राफी, बाहुली काम, म्युझियम आणि स्टील ऑन विल प्रशिक्षण यांसारख्या विविध नाविन्यपूर्ण उपक्रमांची रेलचेल असणार आहे, अशी माहिती माजी नगराध्यक्ष दुर्गाताई तांबे यांनी दिली.

काँग्रेसचे वरिष्ठ नेते, माजी मंत्री बाळासाहेब थोरात आणि माजी आमदार डॉ. सुधीर तांबे यांच्या मार्गदर्शनाखाली हा सोहळा पार पडत आहे. या महोत्सवाचे उद्घाटन रविवारी सकाळी ९ वाजता माजी मंत्री बाळासाहेब थोरात यांच्या हस्ते आणि माजी आमदार डॉ. सुधीर तांबे यांच्या अध्यक्षतेखाली होणार आहे. या उद्घाटनाच्या प्रसंगी आमदार सत्यजित तांबे, डॉ. जयश्रीताई थोरात, नगराध्यक्ष डॉ. मैथिलीताई तांबे आणि उपनगराध्यक्ष नूर मोहम्मद शेख यांच्यासह विविध क्षेत्रांतील मान्यवर उपस्थित राहणार आहेत.

या तालुकास्तरीय बालकला महोत्सवांतर्गत आयोजित रंगभरण स्पर्धेत सर्व विद्यार्थ्यांना मोफत प्रवेश दिला जाणार असून विजेत्यांसाठी विविध गटांत आकर्षक बक्षिसे ठेवण्यात आली आहेत. यात इयत्ता पहिली व दुसरीतील विद्यार्थ्यांसाठी १ ते ५ क्रमांकापर्यंत उत्तेजनार्थ ५०० रुपयांचे बक्षीस, तिसरी व चौथीतील विद्यार्थ्यांसाठी ३०० रुपये बक्षीस, पाचवी ते सहावीतील १ ते ५ क्रमांकासाठी उत्तेजनार्थ २५० रुपये बक्षीस, सातवी ते आठवीतील १ ते ५ क्रमांकासाठी उत्तेजनार्थ २०० रुपये बक्षीस आणि नववी ते दहावीतील १ ते ५ क्रमांकासाठी १५० रुपयांचे उत्तेजनार्थ बक्षीस दिले जाणार आहे.

या रंगभरण स्पर्धा आणि बालकला महोत्सवामध्ये संगमनेर तालुक्यातील जास्तीत जास्त विद्यार्थ्यांनी उत्स्फूर्तपणे सहभाग घ्यावा, असे आवाहन प्रकाश पारखे, चांगदेव खेमनर, सुनील कवडे, संजय मासाळ, राजू गोरे, संजय सोनवणे, मिनीनाथ जोर्वेकर, दत्ता बटवाल, विकास भालेराव यांच्यासह जयहिंद लोकचळवळ आणि संगमनेर तालुका कला शिक्षक संघटनेच्या वतीने करण्यात आले आहे.