संगमनेर महाविद्यालयाचे प्राचार्य डॉ. अरुण गायकवाड यांना ‘डॉ. जे. पी. नाईक आदर्श राज्य शिक्षक पुरस्कार’ प्रदान

Annant Ppangarkar

महाराष्ट्र संवाद न्यूज ऑनलाईन
सावित्रीबाई फुले पुणे विद्यापीठात पार पडलेल्या दिमाखदार सोहळ्यात महाराष्ट्र राज्याचे उच्च व तंत्रशिक्षण मंत्री चंद्रकांत पाटील यांच्या हस्ते संगमनेर महाविद्यालयाचे प्राचार्य प्रो. डॉ. अरुण गायकवाड यांना महाराष्ट्र शासनाचा प्रतिष्ठेचा ‘डॉ. जे. पी. नाईक आदर्श राज्य शिक्षक पुरस्कार’ प्रदान करण्यात आला. या सन्मानामुळे संगमनेरच्या शैक्षणिक क्षेत्रात अभिमानाचे वातावरण आहे.
उच्च व तंत्रशिक्षण विभागाच्या वतीने राज्यातील १२ विद्यापीठांच्या कार्यक्षेत्रातील प्राचार्यांमधून २०२५-२६ या वर्षासाठी ही निवड केली जाते. सावित्रीबाई फुले पुणे विद्यापीठाच्या क्षेत्रातून डॉ. गायकवाड यांना हा बहुमान मिळाला आहे. कार्यक्रमास उच्च शिक्षण संचालक डॉ. शैलेंद्र देवळाणकर, कुलगुरू प्रा. डॉ. सुरेश गोसावी आणि इतर मान्यवर उपस्थित होते.
डॉ. गायकवाड यांनी महाविद्यालयात राष्ट्रीय शैक्षणिक धोरणाची अंमलबजावणी, संशोधनाला चालना, कौशल्यपूर्ण अभ्यासक्रम आणि रोजगाराभिमुख उपक्रमांवर विशेष भर दिला आहे. महाविद्यालयाला स्वायत्त दर्जा मिळवून देण्यात त्यांचे नेतृत्व महत्त्वपूर्ण ठरले.
हा सन्मान महाविद्यालयाच्या गुणवत्तेची राज्यस्तरीय पावती असल्याचे शिक्षण प्रसारक संस्थेचे कार्याध्यक्ष डॉ. संजय मालपाणी यांनी म्हटले, तर डॉ. गायकवाड यांनी हा दिवस जीवनातील अविस्मरणीय क्षण असल्याचे सांगत संस्था व सहकाऱ्यांचे आभार मानले. संस्थेचे अध्यक्ष डॉ. आशुतोष माळी, सचिव डॉ. राजेंद्र लढ्ढा यांच्यासह शिक्षण क्षेत्रातील मान्यवरांनी त्यांचे अभिनंदन केले.