संगमनेर तालुक्यातील धांदरफळ बुद्रुक येथे नवरात्रोत्सवातील दांडिया कार्यक्रमादरम्यान तुफान राडा; दोन्ही बाजूंच्या परस्परविरोधी गुन्ह्यांत लोखंडी रॉड, चाकू आणि फायटरने जीवघेणा हल्ला

महाराष्ट्र संवाद न्यूज ऑनलाईन-
संगमनेर तालुका पोलीस ठाण्याच्या हद्दीतील धांदरफळ बुद्रुक गावाच्या शिवारातील बाजारतळावर नवरात्रोत्सवानिमित्ताने आयोजित करण्यात आलेल्या दांडिया कार्यक्रमाच्या व वाढदिवसाच्या सेलिब्रेशनदरम्यान दोन गटांमध्ये किरकोळ कारणावरून झालेल्या वादानंतर मोठा राडा झाल्याची घटना समोर आली आहे.
या प्रकरणी संगमनेर तालुका पोलीस ठाण्यात दोन्ही बाजूंच्या फिर्यादीवरून परस्परविरोधी गंभीर गुन्हे दाखल करण्यात आले असून, या रक्तरंजित आणि हाणामारीच्या घटनेमुळे परिसरात मोठी खळबळ उडाली आहे.
पोलिसांनी दिलेल्या माहितीनुसार, पहिली घटना शुक्रवारी (१६ ऑक्टोबर) रात्री साडेआठ वाजण्याच्या सुमारास धांदरफळ बुद्रुक गावातील बाजारतळावरील दांडियाच्या मंडपाजवळ घडली. नवनाथ भास्करराव देशमाने (वय ४१, रा. देशमाने मळा, धांदरफळ बु., ता. संगमनेर) यांनी दिलेल्या फिर्यादीनुसार, आरोपी प्रशांत बाळासाहेब कोल्हे याने नवरात्रोत्सवानिमित्ताने दांडिया कार्यक्रमाकरिता टाकण्यात आलेल्या मंडपाचे नुकसान केले होते. या प्रकारची फिर्यादीने विचारणा केली असता त्याचा राग मनात धरून आरोपींनी एकत्र येत बेकायदेशीर जमाव गोळा केला.
या प्रकरणात प्रशांत बाळासाहेब कोल्हे, प्रविण कारभारी कोल्हे, ऋषिकेश कैलास कोल्हे, कमलेश दिलीप डेरे, औंकार आण्णा तोरकडी, प्रणित बंडू गोर्डे, दिलीप श्रीरंग डेरे आणि इतर दोन अनोळखी इसम (सर्व रा. धांदरफळ बुद्रुक) यांनी फिर्यादी नवनाथ देशमाने, उज्वला नवनाथ देशमाने, प्रशांत प्रविण देशमाने व नवनाथ विठ्ठल नाईकवाडी यांना लोखंडी रॉड, लाकडी दांडके, लोखंडी फायटर व चाकू यांसारख्या घातक हत्यारांनी व लाथाबुक्क्यांनी बेदम मारहाण केली.
तसेच फिर्यादीला जीवे मारण्याची धमकी देऊन त्यांच्या गळ्यातील दीड तोळे वजनाची सोन्याची सोनसाखळी बळकावून नेल्याप्रकरणी संगमनेर तालुका पोलीस ठाण्यात गुन्हा दाखल करण्यात आला असून, पुढील तपास पोलीस हवालदार आर. एम. लांघे हे करत आहेत.
याच घटनेची दुसरी बाजू समोर येत पोलिसांनी दिलेल्या माहितीनुसार, याच वेळेत आणि ठिकाणी परस्परविरोधी दुसरा गुन्हा दाखल करण्यात आला आहे. प्रवीण कारभारी कोल्हे (वय २९, रा. कारमळा, धांदरफळ बु., ता. संगमनेर) यांनी दिलेल्या फिर्यादीनुसार, ते व त्यांचे साक्षीदार मित्राचा वाढदिवस साजरा करण्यासाठी बाजारतळावर आले होते. त्या वेळी नवनाथ देशमाने, नवनाथ नाईकवाडी, प्रशांत देशमाने, विशाल काळे, अजिंक्य क्षीरसागर आणि इतर दोन अनोळखी इसमांनी (सर्व रा. धांदरफळ बुद्रुक) एकत्र येत फिर्यादी व त्यांच्या मित्रांना विनाकारण शिवीगाळ केली.
बेकायदेशीर मंडळी जमवून आरोपींनी चाकू, लाकडी दांडके आणि दगडांचा वापर करत फिर्यादी स्वतः, प्रशांत कोल्हे, ओंकार तोरकडी, ऋषिकेश कोल्हे व कमलेश डेरे यांना जबरदस्त मारहाण केली. तसेच साक्षीदाराच्या गळ्यातील सोन्याची साखळी व घड्याळ जबरदस्तीने काढून घेऊन जिवे मारण्याची धमकी दिल्याप्रकरणी संगमनेर तालुका पोलीस ठाण्यात गुन्हा नोंदवण्यात आला असून, या प्रकरणाचा पुढील तपास पोलीस हवालदार एस. के.उगले करत आहेत.
एकाच ठिकाणी, एकाच वेळेत आणि परस्परविरोधी झालेल्या या भीषण हल्ल्यामुळे धांदरफळ गावात दहशतीचे वातावरण निर्माण झाले असून, पोलीस या प्रकरणाचा कसून शोध घेत आहेत.