अहिल्यानगर व संगमनेरात एलसीबीची धडक कारवाई; अकरा लाखांचा मुद्देमाल जप्त, चाळीस गोवंशीय जनावरांची सुटका!

महाराष्ट्र संवाद न्यूज ऑनलाईन-
स्थानिक गुन्हे शाखेने अहिल्यानगर (तोफखाना) आणि संगमनेर शहर पोलीस ठाण्याच्या हद्दीतील अवैध कत्तलखान्यांवर धाड टाकून मोठी कारवाई केली आहे. या धडक कारवाईत पोलिसांनी एकूण ११ लाख ४१ हजार ९०० रुपयांचा मुद्देमाल जप्त केला असून यामध्ये ४०० किलो गोमांस आणि तब्बल ४० जिवंत लहान-मोठ्या गोवंशीय जनावरांची सुटका करण्यात यश मिळवले आहे.
पोलीस अधीक्षक मुम्मका सुदर्शन यांच्या सूचनेनुसार स्थानिक गुन्हे शाखेचे पोलीस निरीक्षक संतोष मुटकुळे यांच्या पथकाने ही कारवाई केली.
जिल्ह्यातील अवैध धंद्यांचे उच्चाटन करण्यासाठी स्थानिक गुन्हे शाखेची विशेष पथके तैनात करण्यात आली होती. यादरम्यान तोफखाना आणि संगमनेर शहर पोलीस ठाण्याच्या हद्दीत गोवंशीय जनावरांची कत्तल व गोमांस विक्री सुरू असल्याची गुप्त माहिती पथकाला मिळाली. माहितीच्या आधारे पोलिसांनी तीन वेगवेगळ्या ठिकाणी छापे टाकून तीन स्वतंत्र गुन्हे दाखल केले आहेत.
तोफखाना हद्दीतील कारवाईत ८१ हजार ९०० रुपये किमतीचे ४०० किलो गोमांस, सत्तूर, सुरा आणि वजन काटा जप्त करत मोईन आरीफ कुरेशी याला ताब्यात घेण्यात आले.
तसेच संगमनेर शहरातील दोन ठिकाणच्या छाप्यांमध्ये अनुक्रमे ४ लाख आणि ६ लाख ६० हजार रुपये किमतीची एकूण ४० लहान-मोठी जिवंत गोवंशीय जनावरे हस्तगत करण्यात आली. या कारवाईत आरोपी बुड्डी कुरेशी, शमशु कुरेशी आणि बुंदी कुरेशी यांच्यावर महाराष्ट्र प्राणी संरक्षण कायद्यान्वये गुन्हे दाखल करण्यात आले असून फरार आरोपींचा पोलीस कसून शोध घेत आहेत.