माश्यांचा प्रादुर्भाव अन् आजारांची भीती! पोल्ट्री फार्मविरोधात आक्रमक पवित्रा, थेट तहसीलदारांना निवेदन

महाराष्ट्र संवाद न्यूज ऑनलाईन-
राहता तालुक्यातील आडगाव बुद्रुक येथील वस्तीजवळ सुरू असलेल्या पोल्ट्री फार्ममुळे पसरणाऱ्या दुर्गंधी आणि माश्यांच्या प्रादुर्भावाने त्रस्त झालेल्या ग्रामस्थांनी आता प्रशासनाविरोधात आक्रमक पवित्रा घेतला आहे. या समस्येकडे तातडीने लक्ष देऊन संबंधित पोल्ट्री फार्मवर कडक कारवाई करण्यात यावी, अन्यथा तहसील कार्यालयाच्या प्रांगणात मुक्काम ठोकून आंदोलन करण्याचा थेट इशारा स्थानिक रहिवाशांनी प्रशासनाला दिला आहे.
याबाबत दिनकर दशरथ शेळके आणि शिवाजी खंडू लहामगे यांच्यासह इतर ग्रामस्थांनी तहसीलदार राहता यांना अधिकृत निवेदन सादर केले आहे. निवेदनात नमूद केल्यानुसार, आडगाव बुद्रुक येथील रहिवासी भागामध्ये सुरू असलेल्या पोल्ट्री फार्ममुळे परिसरात प्रचंड प्रमाणात दुर्गंधी पसरत आहे. याचबरोबर माश्यांचा मोठा प्रादुर्भाव झाल्याने शेजारी राहणाऱ्या नागरिकांचे आणि लहान मुलांचे आरोग्य धोक्यात आले आहे.
परिसरात मस्टडीज, लंपी यांसारख्या आजारांचा प्रादुर्भाव वाढण्याची भीती निर्माण झाली असून, पशुधनाच्या आरोग्याचा प्रश्नही गंभीर बनला आहे. या दुर्गंधीयुक्त वातावरणामुळे लहान मुलांपासून ते वयोवृद्धांपर्यंत सर्वांनाच नाहक मानसिक व शारीरिक त्रास सहन करावा लागत आहे.
ग्रामपंचायतीने दिलेल्या ना-हरकत दाखल्याच्या आधारे हे पोल्ट्री फार्म सुरू असले, तरी त्यामुळे तिथे राहणाऱ्या लोकांना मोठा त्रास सहन करावा लागत असल्याचा आरोप निवेदनात करण्यात आला आहे. पोल्ट्री फार्ममध्ये योग्य पद्धतीने औषध फवारणी केली जात नसल्यामुळे माश्यांची संख्या वाढली आहे. फवारणीच्या अभावामुळे किंवा चुकीच्या पद्धतीमुळे भविष्यात कोणतीही जीवितहानी अथवा आरोग्यविषयक गंभीर समस्या उद्भवल्यास, त्याची संपूर्ण जबाबदारी संबंधित सरकारी अधिकारी आणि पोल्ट्री फार्म चालकाची राहील, असा स्पष्ट इशाराही ग्रामस्थांनी दिला आहे.
या सर्व परिस्थितीचा विचार करून प्रशासनाने या प्रकरणात तातडीने वैयक्तिक लक्ष घालून योग्य ती कारवाई करावी, अशी मागणी करण्यात आली आहे. जर या समस्येवर कोणताही ठोस मार्ग काढला नाही, तर सर्व ग्रामस्थ सहकुटुंब सहपरिवार तहसील कार्यालयाच्या प्रांगणात मुक्काम ठोकून आंदोलन करतील. या आंदोलनामुळे उद्भवणाऱ्या सर्व परिणामांची आणि परिस्थितीची जबाबदारी पूर्णपणे प्रशासनाचीच राहील, असा इशारा निवेदनाच्या शेवटी देण्यात आला आहे.
या निवेदनाच्या प्रती राज्याचे मंत्री डॉ. राधाकृष्ण विखे पाटील, खासदार डॉ. सुजय विखे पाटील, जिल्हाधिकारी अहिल्यानगर, तसेच संबंधित पोलीस ठाणे आणि गट विकास अधिकारी यांच्याकडेही पुढील कारवाईसाठी पाठवण्यात आल्या आहेत.